Израильге қысым күшейді

Израильдің саяси сахнадағы рөліне нұқсан келтіретін тағы бір дерек әшкере болды. Былтыр әлеуметтік желіде ЦАХАЛ әскерінің түрмедегі палестиналық тұтқындарға күш көрсеткені туралы бейнежазба тараған еді. Содан кейін ұзақ тергеу жүргізіліп, кеше Израильдің бұрынғы бас әскери прокуроры, запастағы генерал-майор Ифат Томер-Йерушальми қамалды. 

Ол бейнежазбаның таралуына қатысы барын мойындаған. Бұл жағдай ел ішінде дүрбелең туғызды, әлемнің де назарын аударды.  

Израильге қысым күшейгенімен оған Изарильдің қайтарар жауабы да ұстанымы да өзгерген жоқ. Десе де халықаралық құқық тапталып, Израильді даттаушылардың қарасы көбейіп барады. 

Израиль түрмесінде болған оқиға Израильдің тұтас мемлекет ретіндегі абыройына нұқсан келтірері сөзсіз. Оны Биньямин Нетаньяхудың өзі жоққа шығармайды. Алайда бұл кінәні мойындаудан гөрі ақталуға жақын секілді. Өйткені оқиға кезінде зардап шеккен екінші бір елдің азаматтары. Халықаралық құқыққа сәйкес, адам құқығын таптау - ауыр қылмыс. Халықаралық құқық қорғау ұйымдарының мәліметіне сүйенсек, қазір Израиль түрмелерінде 10 мыңнан астам палестиналық тұтқын отыр. Олардың арасында әйелдер мен балалар да бар.

Биньямин Нетаньяху, Израиль премьер-министрі:

- Сде-тейман түрмесінде болған оқиға Израильге, ЦАХАЛ әскеріне жағылған қара күйе іспетті. Мұндай жағдай бұрын-соңды болған емес. Енді бұл әрекеттер мәжбүрлі түрде не қасақана жасалғаны жөнінде нақты дәлелденуі үшін жан-жақты тергеуді талап етеді.

Соғыстың да өз тәртібі бар. Бұл 1949 жылы қабылданған Женева конфенциясының негізгі ұстанымдарының бірі. Қолына қару алған сарбаздың міндеті әскери мандатын оңды-солды пайдаланып, бейбіт тұрғындарға, әсіресе балаларға, гуманитарлық қызметкерлерге, БАҚ өкілдеріне күш көрсетуге қақы жоқ. Адам құқықтары жөніндегі құжатта тізіліп жазылған темірдей тәртіп бар. Ол қақтығыс алаңындағы әр сарбаз үшін, оған пәрмен беретін соғысқа қатысушы әр тарап үшін білуге тиіс заңдылықтар. Оның сақталмауы ауыр қылмыс.  

АҚШ Израильді айыптады 

Израильге сырттан тағылған айып пен сын да шек жоқ. Басты одақтасы АҚШ-тың өзі таяуда Газа секторындағы әрекеттерге қатысты, Израильді адам құқықтарын таптады деп айыптады. Бұл АҚШ мемлекеттік департаментінің құпия құжатында жарияланған. Бұл жөнінде алдымен Washington Post хабарлады. Басылым дерегіне сүйенсек, АҚШ билігі Изарильді «Лихи» заңдарына қарама-қайшы жүздеген қылмыс жасады дейді. Бұл заңға сәйкес АҚШ шетелдік қақтығыстардағы адам құқығына нұқсан келтірген тарапқа әскери көмек көрсете алмайды. Мұндай мәлемдеме АҚШ тарапынан, қақтығыс басталғалы бері құпия болса да, алғаш рет жасалып отыр. 

Израильге қысым күшейді 

Жалпы осыған дейін Біріккен Ұлттар Ұйымы, Газа секторында геноцид өршіп, аштық жайлағанын ресми түрде растады. Ал Еуроодақ Израильге қарсы санкция салуға шақырды. Десе де бұған пысқырып жатқан Израиль жоқ. Әскери операция бейбіт келісімге қарамастан әлі де жалғасып жатыр. Бұл әрекетті мұсылман елдері назардан тыс қалдырмай ашық талқылап, қажет болған жағдайда күш жіберуге даяр екенін айтты. Мәлімдеме Түркия, Біріккен Араб әмірліктері, Индонезия, Қатар, Пәкістан, Сауд Арабиясы және Иордания тарапынан мақұлданды. 

Хакан Фидан, Түркия сыртқы істер министрі:

- Газа секторында геноцидтің қайта басталғанын қаламаймыз. Бұл пікірді бүгінгі кездесуге қатысушы елдер де костайды. Мысырда жасалған бейбіт келісімге Түркия президентінің де бақылаушы екені баршаңызға мәлім. Сондықтан, бейбітшілік жөніндегі ұстанымды берік ұстау үшін, қолдан келгеннің бәрін жасаймыз.