Оңтүстік Кореяда Д. Трамп пен Си Цзиньпин кездесуіне дайындық басталды

Оңтүстік Кореяның Кёнджу қаласында күзет күшейтілді.

Қазір мұнда АҚШ Президенті ресми сапармен жүр. Дональд Трамп Қытай халық республикасының төрағасы Си Цзиньпинмен келіссөз өткізу үшін  барды. АҚШ пен Қытай басшыларының  кездесуі ертең Азия-Тынық мұхиты экономикалық ынтымақтастық ұйымының  саммиті аясында өтеді.

Кёнджуда шамамен 250 мың адам тұрады. Сондықтан саммиттің  қауіпсіздігін тек қала тұрғындарының күшімен қамтамасыз ету мүмкін емес. Сол себепті елдің басқа өңірлерінен  тұрғындар тартылды. Қалада күн сайын 19 мыңнан астам полиция қызметкері, арнайы жасақ пен әскерилер қоғамдық тәртіпті күзетуде. Ал волонтер ретінде  студенттер мен үй шаруасындағы адамдар жұмыс істеп жүр.

Пак Мин Чжон, волонтёр:

- АТЭС саммиті қаламызды әлемге танытудың тамаша мүмкіндігі. Кёнджудың мәдени мұрасы бай, сондықтан саммит қонақтары соны тамашалай алады деп үміттенемін. Мен үй шаруасындағы әйелмін, бірақ ағылшын тілін білетіндіктен волонтёр болдым. Шетелдік қонақтарға керекті жеріне жетуге көмектесемін.

Пак Ра Он, волонтёр:

- Мен Сеул университетінде оқимын. Саммит кезінде көлік қатынасына жауаптымын. Жұмысқа  қабылдау туралы хабарландыруды көріп, өтініш бердім. АТЭС саммиті сияқты маңызды шараға қатысып отырғаныма мақтанамын.

Дональд Трамп бүгін Кёнджу қаласына келді. Ол америкалық компанияға тиесілі қонақүйде қонады. Ал Си Цзиньпин мінген ұшақ ертең келмек. Қытай Халық Республикасының төрағасы 528 жылы салынған Пульгукса буддалық ғибадатханасының жанындағы «Колон» қонақүйіне жайғасады. Осы нысандарға жақын көшелерде арнайы жасақ көліктері тәулік бойы кезекшілік атқарып жүр.

Бүгін Кёнджу қаласындағы ерекше қорғауға алынған орын - Дональд Трамп тоқтаған «Хилтон» қонақ үйі болды. Ол жерге кіргендердің барлығы әуежайдағыдай қатаң тексеруден өтті. Ал қонақүйге көршілес ғимараттардағы адамдарға шатырға шығуға тыйым салынды.

Саммит қарсаңындағы қарбалас Кёнджу тұрғындары үшін біршама қолайсыздық тудырды.  Оларға қаланың тарихи бөлігіне өтуге тыйым салынғандықтан, көшелерде  кептеліс көбейді. Ал дәмхана мен мейрамхана иелері, керісінше, жоғары деңгейдегі кездесулерге қуанышты - келушілер саны бірнеше есе артқан. Мысалы, мына  мейрамханаға туристердің тікелей келуіне  жасанды интеллект негізіндегі онлайн-аудармашы мен «Кальмар ойыны» сериалында көрсетілген тәттілер түрткі болыпты.

Хо Ён Джа, мейрамхана директоры:

- Бұрын күніне шамамен жүз адам келетін, қазір мыңға жуық. Барлығына қызмет көрсетіп үлгере алмай жатырмыз. Танымал болуымыздың себебі – интерьеріміз әдемі және кимчи салатымыз дәмді.

Ли Чан Хи, мейрамхана иесі:

- Ең алдымен еліміздің қазіргі жаһандық экономикалық қиындықтарды еңсергенін қалаймын. АҚШ-пен сауда-саттық және жалпы әлемдік экспорт арқылы экономикамыз қайта жанданса жақсы болар еді.

АҚШ пен Қытай саммиті қарсаңында Кёнджуда заңсыз мигранттарды анықтау жұмысы жүргізілді. Осы айда құжатсыз жүрген 20-дан астам адам елден шығарылды. Қала мен көршілес елді мекендердегі барлық қонақүйлерге  шетелдік меймандар  туралы міндетті түрде хабарлау тапсырылған. Бұл талапты бұзғандарға 348 АҚШ долларына дейін айыппұл салынады.

Авторлары: Владислав Цой, Ольга Лян