Қазақстанда халықаралық әуежайларға қойылатын талаптар жаңартылды

Қазақстанда халықаралық рейстерге қызмет көрсететін әуежайларды ашу және пайдалану ережелері жаңартылды.
Тиісті бұйрыққа көлік министрінің міндетін атқарушы қол қойған. Құжат 2026 жылғы 10 мамырдан бастап күшіне енеді.

Жаңа өзгерістер 2011 жылдан бері қолданыста болған нормаларды нақтылап, әуежай инфрақұрылымы мен жабдықталуына қойылатын талаптарды күшейтеді.

Ережеде алғаш рет «халықаралық әуежай» ұғымы бекітілді. Ол – кедендік, шекаралық және санитарлық-карантиндік бақылау ұйымдастырылған әуе айлағы.

Жаңартылған талаптарға сәйкес, мұндай әуежайларда:
– жарамды аэродром сертификаты және шетелдік әуе компанияларына қызмет көрсететін персонал;
– «қызыл» және «жасыл» дәліздері бар кедендік бақылау жүйесі;
– ұшу және қону аймақтары, декларация рәсімдеу бөлмелері;
– кемінде екі тексеру пункті мен паспорттық бақылау кабиналары;
– тыйым салынған заттарды анықтайтын арнайы жабдықтар болуы тиіс.

Ірі авиациялық хабтарға қосымша талаптар енгізілді. Олардың қатарында транзиттік жолаушыларға арналған аймақтар, жүк және багаж қоймалары, сондай-ақ депортацияланған немесе ұсталған адамдарға арналған оқшаулағыштар бар.

Сондай-ақ құжатта әуежай қызметтерінің өзара әрекеттесу тәртібі, жолаушыларды тасымалдауға арналған көлік құралдары және санитарлық бақылау талаптары нақты көрсетілген.