Шымкентте үй тазалауға келген әйелді қатыгездікпен өлтірген жасөспірім сотталды

АСТАНА, 4 жетоқсан – Sputnik. Шымкентте қатыгездікпен адам өлтірген жасөспірімге сот үкімі шықты, деп хабарлайды қалалық сот.

Жасөспірім сотталушыға адам өлтіру, өлген адамның мәйітін қорлау, ұрлық баптарымен айып тағылған. Жантүршігерлік оқиға биыл шілдеде болған.

"Кәмелет жасына толмаған сотталушы 21 шілдеде Telegram әлеуметтік желісінде үйді тазалап беретін қыз-келіншектер қажет екені туралы жарнама жариялаған. Жәбірленуші осы жарнама бойынша хабарласып, сол күні үйді тазалап, келіскен еңбек ақысын сұраған. Алайда, сотталушы осы еңбек ақыны төлемеу мақсатында жәбірленушіні өлтіріп, оның ұялы телефонын ұрлаған", - дейді соттағылар.

Кәмелетке толмаған сотталушының кінәсі толық дәлелденіп, ол өз ісіне қатты өкінетін айтқан.

"Сот жасөспірімді Қылмыстық Кодекстің 99-бабының 1-бөлігі, 188-бабының 1-бөлігімен кінәлі деп танып, оған қылмыстардың жиынтығы бойынша 7 жыл 6 ай мерзімге бас бостандығынан айыру жазасын тағайындады", - дейді ведомстводағылар.

Сотталушының Қылмыстық кодекстің 314-бабының 1-бөлігі "Өлген адамдардың мәйiттерiн және олар жерленген жерлердi қорлау" бойынша кінәсі дәлелденбеуіне байланысты бұл баппен кінәсіз деп танылды.

Жасөспірім жазасын кәмелетке толмағандарға арналған түзеу мекемесінде өтейді. Үкім заңды күшіне енген жоқ.