Төлемді 30 күн кешіктіргендерге енді несие берілмейді

2026 жылғы 19 наурыздан бастап «Банктер және банк қызметі туралы» заңға енгізілген өзгерістер күшіне енді.

Жаңа талапқа сәйкес, енді банктер қолданыстағы несиесі бойынша 30 күннен астам мерзімі өткен берешегі бар азаматтарға жаңа қарыз бермейді. Бұған дейін бұл шектеу 90 күн кешіктіру мерзімінен кейін ғана қолданылатын.

Алайда ерекше жағдай ретінде қарызды тиімді шарттармен қайта қаржыландыруға рұқсат етіледі.

Сонымен қатар, банктерге биометриялық сәйкестендірусіз онлайн несие рәсімдеуге тыйым салынды. Бұл талап қаржылық қауіпсіздікті күшейтуге бағытталған.

Жаңа өзгерістерге сәйкес, егер несие алаяқтық жолмен рәсімделгені дәлелденсе, жауапкершілік қаржы ұйымына жүктеледі. Қарыз алушы қылмыстық іс бойынша жәбірленуші деп танылса, берешек есептен шығарылып немесе заңсыз ұсталған қаражат қайтарылуы мүмкін.

Бұдан бөлек, банкроттық рәсімінен өткен азаматтарға да қосымша шектеулер енгізілді. Енді олар банкроттық рәсімі аяқталған күннен бастап бес жыл ішінде несие ала алмайды.