Ұлытаудың Атасу ауылында өрт сөндіру бекеті ашылды

Ұлытау облысында «Ауыл құтқарушылары» бағдарламасы аясында алғашқы өрт сөндіру бекеті ашылды.

Атасу ауылында орналасқан жаңа нысан осы төңіректегі елді мекендерді өртке қарсы қорғаныспен қамтамасыз етеді. Төтенше жағдайлар қызметкерлері «Енді өрттің алдын алу және оны жою шараларын жедел жүргізуге мүмкіндік мол» дейді.

Сондай-ақ өңірде елдегі тұңғыш жасақталған әуе құтқару жасағы да жұмысқа кірісті.

Ұлытау облысында халық саны 1 мыңға жетпейтін 26 елдімекенде өртке қарсы қызмет жасақтау қажет. Төтенше жағдайлар департаменті бұл міндетті «Ауыл құтқарушылары» бағдарламасы аясында жергілікті әкімдіктермен бірлесе жүзеге асыруды жоспарлап отыр. Атасу ауылында ашылған жаңа нысан соның алғашқысы. Мұнда өрт сөндіру техникасына арналған орын, ас үй, демалыс және тұрмыстық бөлмелер бар.

Дархан Қоңыршынов, облыстық ТЖД басқарма бастығы:

- ТЖД бөлімшелері жеткенге дейін бұл бөлімшелер өз алдына өрттің таралуын тоқтатуға көп септігін тигізеді. Бұл жерде өрт сөндіру техникасы ғана емес сонымен қатар басқа да құтқару техникалары бар. Снегоход, қарда, батпақта жүретін техника бар. Сонымен қатар өрт сөндіруге арналған киімдер берілді. Байланыс түрлері бар. Радиостанциялық байланыс, спутниктік байланыс дегендей. 

Ғимарат толықтай демеушілердің қаржысына салынды.  Ерікті өрт сөндірушілер  жұмылдырылған бекет радиусы 10 шақырым аумақтың өрт қауіпсіздігіне жауап береді.

Дархан Қоңыршынов, облыстық ТЖД басқарма бастығы:

- Ауылдық жерлерде 20 минуттан аспау керек өрт сөндіру техникалары, жалпы құтқару техникалары жету нормасы. Ал шалғайда  орналасқаннан кейін 40 минуттан асып кетуі мүмкін. Сондықтан бұл жедел әрекет етуге өте маңызды роль атқаратын болады.

Төтенше жағдайлар қызметі «Ауыл құтқарушылары» бағдарламасы аясында шағын елдімекендерде өртке қарсы инфрақұрылымды нығайту жұмыстары келер жылы да жалғасатынын айтады. Ал, шалғайдағы ауылдарда төтенше жағдайлар болған кезде әуе қорғаныс жасағы көмекке барады. ТЖМ қарасты тұңғыш авиациялық жасақ Жезқазғанда орналасқан. Авиациялық техникаларға арналған заманауи ангар жақында қолданысқа берілді. Нысанда ұшу алдындағы дайындық аймағы, қойма және оқу-жаттығу секторы бар.  

Арман Қоңырбаев, әуе жасағының бастығы:

- 6 облыспен шекараласпыз біз. 6 облысқа, Қазақстанның әр түкпір жағына ұшып жете алады өте қысқа уақытта. Бұл ашылғалы үш рет ұшты санавиация бойынша. Екі рет Қаражал қаласынан, бір рет Жәйремнен ауырған адамдарды Жезқазған қаласына алып келді. 

Биыл Қаражал мен Жезқазған қаласында жаңадан өрт сөндіру бөлімі ашылды. Сәтбаев қаласы мен Жәйрем кентінде тағы екі өрт сөндіру депосының құрылысы жүріп жатыр. Бұл «Төтенше жайдайларға ден қою уақытын едәуір қысқарту үшін қажет» дейді құтқарушылар. Бұдан бөлек облыс құрылғалы төтенше жағдайлар департаментінің техника паркі 50 пайызға жаңарды. 

Елдос Кәкенов, Нұрлан Исмаилов