Үздік детектив шығармалар анықталды

Таразда детектив шығармалар байқауының жеңімпаздары марапатталды.

Қаламгерлердің республикалық сайысы қазақ әдебиетінде детектив жанрының негізін қалаушы Кемел Тоқаевтың құрметіне арналды. Осымен сегізінші рет өткізілген додаға ел аумағынан 70-тен аса қаламгер қатысты.

Республикалық байқаудың басты мақсаты - қазақ әдебиеті әлемінде кенжелеп қалған детектив жанрын жандандыру. Шығармашылық байқау 7 ай бұрын жарияланып, 70-тен аса автордың еңбегі қабылданды. Сегіз жыл ішінде сайыстың ауқымы мен жазушылар туындыларының деңгейі біраз өсті, - дейді ұйымдастырушылар.

Досымбек Өтеғалиев, «Заң» Медиа-корпорациясы» ЖШС директоры:

- Қазақ детективінде Кемел Тоқаевтың аты бірінші кезекте аталады. Сол себепті байқауды сол кісінің атымен атағанбыз. Ұрлық түбі қорлық дегенді түсіндіру. Өсіп келе жатқан ұрпаққа ашылмайтын қылмыстың болмайтындығын білдіру. Негізгі мақсатымыз қылмыссыз әлемді қалыптастыруға белгілі бір деңгейде үлес қоссақ деген мақсат.

Шытырман жанрда қалам тербегендер арасында жазушылармен қоса журналистер, заңгерлер мен құқық қорғау саласының қызметкерлері бар. Солардың бірі – 24KZ телеарнасының тілшісі Шернияз Жалғасбекұлы. Жас жазушы соңғы екі жылда детектив еңбектер жазып жүр. Осы сайысқа «Кебін. Қабірдегі құпия» туындысын ұсынып, 3-орынды еншіледі. Ал инклюзивтік тақырыпты қаузаған Гүлден Жылкелдиева, «Мылқау түн» шығармасымен бас жүлдені иеленді. Туындыда мылқау қызға жасалған қатыгездік пен қылмыстарды әшкерелеу жайы баяндалады.

Шернияз Жалғасбекұлы, жас жазушы:

- 3-орынға лайықты деп таныған екен. Әрине, бұл мен секілді шығармашылық жолын енді бастаған жас жазушылар үшін үлкен қолдау үлкен мативация деуге болады. Бұндай байқаулардың көп болуы жас жазушылардың көптеп пайда болуына көптеп еңбек жазуына өз әсерін тигізеді деген ойдамын.

Гүлден Жылкелдиева, байқау жеңімпазы:

- Бұл қазіргі қоғамда күйіп тұрған мәселе деп ойлаймын. Сондықтан бүгінгі әділ қазылардың қоғамдағы белең алып тұрған оқиғаға мән беріп отырғанына бүгін көзім жетті. Соған ризамын.

Байқау жүлдегерлері мен жеңімпаздарына диплом мен қаржылай сыйлық берілді. Сонымен қоса үздік шығармалар алдағы уақытта жинақ ретінде басылып, оқырман назарына ұсынылады.

Авторлары: Мерей Бает, Бақытжан Бапаев, Елдар Байділдә