Жапонияда қымбат сағат ұрланып, дүкенге кешірім хатпен бірге қайтарылды

Токиода белгісіз ер адам дүкеннен құны 46 миллион иена (шамамен 257 мың еуро) тұратын Audemars Piguet швейцариялық сағатын ұрлап кетіп, бірнеше күннен кейін оны курьер арқылы қайтарып берген. Сәлемдеменің ішінде қолмен жазылған кешірім хат болған, деп хабарлайды Tengri Life The Japan Times басылымына сілтеме жасап.

Токио полициясы сағатты ұрлаған күдіктіні іздестіруді жалғастырып жатыр.

Полицияның мәліметінше, ер адам дүкенге келіп, құны шамамен 46 миллион иена (292 000 доллар) болатын Audemars Piguet сағатын тағып көріп, артынша сағатпен бірге ізін суытқан. Оқиға кезінде дүкенде екі қызметкер болған, олар зардап шеккен жоқ.

Бірнеше күннен кейін курьер сағатты дүкенге әкелген. Сериялық нөмірін тексергеннен кейін қызметкерлер бұл шынымен де ұрланған сағат екенін растады.

Сәлемдеме Айти префектурасынан жіберілген және оның ішінде қолмен жазылған кешірім хат болған.

Сәлемдемеде аты-жөні мен мекенжайы да көрсетілген, бірақ полиция бұл ақпарат жалған деп есептейді.

Тамыз айында осы сауда кешенінде тағы бір оқиға орын алған болатын: бірінші қабаттағы басқа дүкеннен жалпы бөлшек сауда құны шамамен 200 миллион иена болатын бірнеше қымбат сағат ұрланған. Осы оқиғаға байланысты ұрлық жасады деген күдікпен Чилидің екі азаматы тұтқындалып, кейіннен оларға айып тағылды.

Бізді Google-дың негізгі дереккөздер тізіміне қосыңыз