Білім ошақтары жаңа оқу жылына дайын

Алдымен білім жүйесі туралы сәл кеңірек тарқатып айта кетсек жөн болар. Өңірлік бұл жүйеде 1 270 білім беру ұйымы жұмыс істейді. Бұл ұйымдарда 23 811 педагог еңбек етеді. Оқырманның көз алдына елестету үшін тағы да деректерге жүгінуге мәжбүрміз. Облыста жалпы контингенті 36 694 баланы құрайтын 595 мектепке дейінгі білім беру ұйымы бар. Сәл таратып айтатын болсақ, оның 283-і балабақша, 312-сі мектепке дейінгі шағын орталық. Балабақшаларда – 31 733 бала, шағын орталықтарда 4 961 бала тәлім-тәрбие алады. Осы арада жағымды жаңалық туралы екпін түсіре айтып кеткен жөн. Жыл басынан бері 347 жаңа орын ашылды. Болжамды мәліметтерге сәйкес, 2026–2027 оқу жылында 1-сыныпқа 12 128 бала барады деп күтіліп отыр. Оларды барлық жағдайы бар заманауи білім ошақтары қарсы алады. Кестеге сәйкес биыл да облыс бойынша 1-сыныпқа құжаттар қабылдау 10 маусым мен 31 тамыз аралығында жүргізіледі. Бүгінгі күнгі жағдай бойын­ша облыстың жалпы білім беретін мектептеріне денсаулығында шектеуі бар 78 бала қабылданған. 15 балаға педагог ассистенттің сүйемелдеуі қажет. Дәтке қуаты, әрбір бала үшін жан-жақты, сапалы білім алуға барлық жағдай жасалған. Бір сөзбен айтқанда, қатарларынан қалмай, өздерінің қабілет-қарымына сәйкес білім нәрімен қаруланатын болады.

Қазіргі таңда халық арасында ақпараттық түсіндіру жұмыстары кеңінен жүргізіліп жатыр. Бұл жұмысқа айрықша мән беріліп отыр. Осы арада білім нысандарының құрылысы туралы сыналай айта кеткен жөн. Бұл – заман талабына сай дайындықтың сапасын көрсететін көрсеткіш. Білім саласындағы қарқынды жұмысты халық көріп отыр. Болашаққа салынған инвес­тиция есебіндегі игі істің көлемі көңіл қуантарлық. Нақты дерек келтіру үшін кейінгі үш жылда облыста 21 896 орынға арналған 35 білім нысаны салынғандығын айта кеткеніміз жөн. Бұлардың барлығы соңғы үлгідегі мейлінше жақсы жағдай жасалған, сәулеті келіскен білім ошақтары. Оның ішінде 726 орындық 3 балабақша, 19 520 орындық 27 орта білім беру нысаны, 1 650 орындық 5 суденттік жатақхана бар. Студенттік жатақханалардың тапшылығы туралы арагідік мәселе көтеріліп жүрген болатын. Мемлекет тарапынан көрсетілген шынайы қамқорлықтың арқасында өткір мәселенің түйіні тарқап, көп-көрім жақсарып қалды. Бұл жай сайып келгенде облыстағы апатты және үш ауысымды мектептер мәселесін шешуге, білім ошақтарындағы оқушы орындары­ның тапшылығын айта қаларлықтай азайтуға, шәкірттердің білім алуы мен студенттердің жайлы жерде тұруына қолайлы жағдай жасауға зор мүмкіндік беріп отыр.

Биыл 840 орындық 3 балабақша­ның құрылысын аяқтау жоспарланып отыр. Қосшы қаласында 1 500 орындық мектептің құрылысын бастау көзделген. Жаңа оқу жылы қарсаңында 10 білім ошағына күрделі жөндеу жұмысы жүргізілді. Бүгінгі күні барлық нысандар бойынша конкурстық рәсімдер толық аяқталып, мердігер ұйымдар анықталып отыр. Қазіргі уақытта өңірдің барлық мектебінде дайындық жұмысы ширай түскен. Күрделі жөндеу жұмысы жүргізілетін білім ошақтарындағы іс жұмыс кестесіне сәйкес жүргізілуде. Күрделі жөндеу жұмысы жүргізілген 10 білім ошағының бесеуі – қалалық, бесеуі – аудандық мектеп. Қалалық мектептер дегенде, облыс орталығындағы №12, №16, Степногор қаласындағы №1, Макинск қаласындағы №1, Астана қаласындағы №2 «Дарын» облыстық мамандандырылған мектеп-лицей интернатын айта кетуіміз керек. Осындай жанды жанашырлықтан аудандық мектептер де қалыс қалған жоқ. Сөзімізді нақтылай кету үшін Аршалы ауданындағы Ижевск ауы­лындағы жалпы орта білім беретін мектебін, Ерейментау ауданындағы Еркіншілік ауылы мен Зеренді ауданының Алексеевка білім ошағын айта кетуіміз керек. Бурабай ауданында орналасқан «Жұлдыз» санаторлық үлгідегі облыстық мектеп-интернатқа да күрделі жөндеу жұмысы жүргізіледі. Осы шаруаға биыл облыстық бюджеттен 5,6 миллиард теңге көлемінде қаржы бөлінген болатын.

Биыл 106 нысанға ағымдағы жөндеу жұмыстары жүргізілуде. Бұл іске 1,7 миллиард теңге қаражат қарастырылып отыр. Жалпы сомасы 375,0 миллион теңгеге 30 жаңа модификациядағы кабинет сатып алу жоспарланған.

Облыста 27 колледж жұмыс істейді. 1 шілдедегі жағдай бойынша білім алушылар құрамы 12,4 мың адамды қамтиды. Бір жақсысы, 10,6 мың білім алушы мемлекеттік білім беру аясында тегін білім алады. 2025–2026 оқу жылында мемлекеттік тапсырыс бойынша 5 927 адам қабылданды. Ал 2026–2027 оқу жылында 5 900 оқушы қабылдау жоспарлануда. Бір жақсысы, 132 кәсіпорынның өтінімі негізінде екі мыңнан астам орынға нысаналы мемлекеттік білім беру тапсырысы бөлінді.

Өңірде апатты және үш ауысымды мектептердің мәселесі толық шешілген. Бұл – ауыз толтырып айтарлық жақсы жағдай. Қазіргі кезде мұндай мәселе мүлде жоқ. Оқушы орындары­ның тап­шылығын болдырмау, білім беру инфрақұрылымын дамыту мақсатында жаңа мектептер салу жұмысы жүйелі жалғасып келеді. Қолданыстағы мектептерге күрделі жөндеу жүргізу, оларды реновациялау және материалдық-техникалық базасын жаңғырту бойынша кешенді жұмыс жалғасады. Бұл шаралар білім беру ұйымдарында қауіпсіз әрі қолайлы оқу жағдайларын қамтамасыз етуге, алдағы уақытта апатты немесе үш ауы­сымды мектептердің пайда болуына жол бермеу­ге бағытталып отыр.

Ақмола облысы