Грантқа қол жеткізетін платформа

Egemen.KZ парақшасындағы ақпаратқа сәйкес, Qazaq24.com хабар таратты..

«Digital Business» пен «Astana Hub» бірлескен «Орталық Азияның 100 стартап тарихы» жобасы аясында небір мықты бастамалар таныстырылып жатыр. Солардың ішінде ерекше көзге түскені – Әмине Қадыр негізін қалаған «YerAI Mentor» стартабы. Бұл платформа шетел университеттеріне құжат тапсыруды жүйелеп, талапкердің мүмкіндігіне сай оқу орны мен грант түрін іріктеуге көмектеседі. Эссе жазу, құжат рәсімдеу, сұхбат жауаптарын пысықтау сияқты қадамдарды бір жерге жинап, әр кезеңде нақты бағыт береді.

Коллажды жасаған – Зәуреш Смағұл, «ЕQ»

Қалай басталды?

Әмине Қадыр оқушы кезінен-ақ алғыр болған. Соның нәтижесінде мектеп бағдарламасын екі жыл ерте тәмамдап, 16 жасында шетелге құжат тапсырады. Сөйтіп, Босния және Герцеговинаның астанасы Сараевода орналасқан International Burch University грантын иеленеді. Осылайша, ол 19 жасында бакалавр дипломын қолына алған. Кейін басқа да мемлекеттерде білімін шыңдап, 2017 жылы Назарбаев университетіне оқытушы-ассистент ретінде жұмысқа орналасады. Мінеки, осы кезде болашақ стартаптың алғашқы ұшқындары пайда болған еді.

«2019 жылы бөпелі болдым. Декретке шыққан кезде екі нәрсені қатар ойладым: үйде отырып-ақ табыс табу керек. Бірақ баламнан алыс кеткім келмейді. Сол сәтте «Неге онлайн оқытпасқа?» деген ой келді. Осылайша, өз қаражатыма ағылшын және түрік тілдерінен, сондай-ақ «IELTS», «SAT» және шетелге оқуға түсуге дайындық бойынша онлайн мектеп аштым. Алғашында сатудан бастап, сабақ өту мен менторлыққа дейін бәрін өзім атқардым. Кейін жұмыс жүйеленіп, оқытушылар командасы қалыптасты. Біз көбіне ауылдар мен шағын қалалардағы жастарға көңіл бөле бастадық. Платформа іске қосылғаннан кейін бірнеше айдың ішінде ай сайын кемінде 50 оқушыға тұрақты түрде қызмет көрсететін деңгейге жеттік. Бірақ мен бұдан да көбірек адамға көмектескім келді. Менторлық мүмкіндік бәріне қолжетімді болуы керек деп санаймын. Алайда білім беру орталықтары атқаратын барлық қызметті бір жерге біріктіретін платформа жоқ екенін байқадым. Сөйтіп, оны өзім жасауға бел будым. Осылайша, «YerAI Mentor» пайда болды», дейді Ә.Қадыр.

Кейін стартап иесі «Astana Hub» ұйымдастырған «AI’preneurs» бағдарламасына қатысып, екінші лек қорытындысына дейін өткен. Ол осы технопаркте жүріп шетелде оқуға ниетті талапкерді басынан аяғына дейін жетелейтін толыққанды цифрлық ментор жасау туралы нақты шешім қабылдапты. Жобаның алғашқы кезеңінде Әмине өнімнің көп жұмысын өзі атқарған. Дизайнын ойластырып, жүйенің логикасы мен архитектурасын құрып, жасанды интеллектіні интеграциялаған. Ол техникалық білімі терең болмағанын да жасырмайды. Дегенмен университеттен белгілі бір IT базаны алып шыққанын, ал жетіспейтін дағдыларды кейін өз бетімен меңгергенін айтады. Қазір жүйеде «IELTS» дайындығы, эссе жазу, грантқа бағыттау, виза рәсімдеуге қатысты бөлімдер бар. Платформа қазақ, орыс, ағылшын тілдерінде қолжетімді.

Қазір қай кезеңде?

Қазір «YerAI Mentor» қалыптасқан платформа ретінде жұмыс істеп тұр. Ә.Қадырдың айтуынша, жүйе екі бағытты біріктіреді. Бірі – талапкерге жол көрсететін менторлық тәсіл. Екіншісі – жасанды интеллектіге сүйенген тексеру мен бағыттау. Платформадағы қызметті бірнеше бағытқа бөліп түсіндіруге болады.

Алғашқысы – ауызша ағылшыншаға арналған бөлім. Мұнда «IELTS Speaking»-тің толық үлгісі бар. Сонымен қатар күнделікті сөйлеуді дамытуға арналған жаттығулар және виза сұхбатын қайталап пысықтайтын жүйе енгізілген. Нұсқаулықтары үш тілде берілгенімен, сөйлесу тәжірибесі ағылшын тілінде өтеді.

Екіншісі – жазба жұмысты тексеретін құрал. Бұл «IELTS Writing» форматындағы мәтінді қарап шығады. Құрылымы дұрыс па, ойы жинақы ма, дәлелдері жеткілікті ме – соның бәріне назар аударып, кемшін тұсын көрсетеді.

Үшіншісі – түйіндеме дайындау бөлімі. Мұнда талапкерге түйіндемесін халықаралық талапқа сай ықшамдап, дұрыс форматқа түсіруге көмектеседі. Қандай ақпаратты алға шығару керек, нені қысқарту керек дегендей нақты ұсыныс береді.

Төртіншісі – оқу орны мен грантты іріктеу жүйесі. Пайдаланушының профилін алып, базадағы деректермен салыстырады.

Бесіншісі – эссе құрастыруға арналған көмекші. Бұл құрал әуелі талапкерге сұрақ қояды. Сол жауаптарға қарап эссенің құрылымын ұсынады. Қай жерін нақтылау керек, ойды қалай жүйелеуге болады, мәтінді қайтіп нанымды ету керек деген бағыт береді.

Платформада виза сұхбатына дайындық та қарастырылған. АҚШ визасына қатысты типтік сұрақтар мен жиі жіберілетін қателер көрсетіледі. Жасанды интеллектімен «сұхбаттасып», жауапты қайта-қайта шыңдауға мүмкіндік бар. Қазір Ұлыбритания, Канада, Аустралия визасына арналған жаттықтыру бөлімі де қолжетімді.

Тағы бір маңызды қабаты – база. Жүйеде 500-ден аса шетелдік университет пен 73 халықаралық шәкіртақы жинақталған. Команда ұстанатын тәсілдің бірі – «көп нұсқамен» жүру. Талапкер 3–5 елдегі 20-дан аса университетке қатар құжат тапсырады. Мұндайда 4-тен 18-ге дейін ресми қабылдау хатын алуға мүмкіндік мол. Қызмет ақысы жазылым арқылы төленеді. Апталық, айлық, тоқсандық, жылдық нұсқалары бар.

Ендігі меже қандай?

«YerAI Mentor» командасы енді өнімді шетел нарықтарына шығаруды көздеп отыр. Қазір платформаны жүздеген адам қолданады. Аудиторияның 70 пайызын ел азаматтары, 30 пайызын Моңғолия жастары құрайды. Бұл жобаның сыртқы нарыққа сұранысы барын көрсетеді.

Келесі үлкен қадам – Еуропаға жол ашу. Команда Германиядағы «Constructor University» ұйымдастыратын «Constructor Start Acceleration Program» бағдарламасына іріктелген. Байқауға 1680 стартап қатысып, соның ішінен 26 жоба ғана өткен. Сол тізімде «YerAI Mentor» да бар. Жоба авторлары мұны еуропалық нарықты сынап көруге, халықаралық серіктестер табуға мүмкіндік деп отыр. «Demo Day» кезінде жобаны инвесторлар мен еуропалық венчурлық қорларға таныстыру жоспарланған.

Қаржыландыру жағы да күн тәртібінде тұр. Қазір стартап pre-seed (бастапқы) кезеңінде. Сондықтан команда инвестициялық ұсыныстарға ашық екенін айтады. Жергілікті әрі халықаралық бизнес өкілдерімен келіссөз жүргізіп жатыр. Негізгі мақсат – команданы күшейту, жаңа ЖИ қызметтерін қосу, платформа мүмкіндігін кеңейту.

Ә.Қадырдың пайымынша, талапкерге ең қиын мәселе университетке түсу емес, толық немесе жартылай шәкіртақы ұтып алу. Сондықтан жоба алдағы уақытта грант іздеу мен өтінім беруді жеңілдететін бағытты күшейтпек.

«Бір грантпен шектелмеу керек. Өтінішті бірнеше елге қатар тапсыру қажет. Дайындықты 10-11 сыныпта ғана емес, ертерек бастаған дұрыс. Тіл деңгейін көтеру, тестілеуге дайындалу, сонымен қатар жеке портфолионы қалыптастыру қатар жүруге тиіс. Университет бағаға қарап қана шешім шығармайды. Талапкердің мінезі, қызығушылығы, қатысқан жобалары, қоғамға қосқан үлесі де ескеріледі. Сондықтан жетістікті ұмытпай жазып жүру, кейін оны жақсы эссеге айналдыру маңызды», дейді жоба жетекшісі.

Соңғы жаңалықтар