Qazaq24.com, Tengrinews.KZ дереккөзінен алынған мәліметтерге сүйене отырып ақпарат жариялайды..
Шымкентте сәуірде әуежайда болған оқиғаға қатысты тергеу аяқталды. Онда FlyArystan ұшағы қонғаннан кейін ұшу-қону жолағында жануармен соқтығысқан болатын, деп хабарлайды Tengri Travel.
Қазақстанның Авиациялық әкімшілігі жануар аэродром аумағына Қорғаныс министрлігіне қарасты әскери бөлім жауапкершілік аймағындағы периметрлік қоршау ақауы салдарынан кіріп кеткенін хабарлады.
Ит ұшу алаңына қалай тап болды?Жаңа мәліметтер туралы "Қазақстанның Авиациялық әкімшілігі" АҚ авиациялық қауіпсіздік жөніндегі атқарушы директоры – юасқарма мүшесі Жәнібек Шәріпбаев айтып берді.
Оның сөзінше, "Шымкент әуежайы" АҚ жүргізген тергеу жануар аэродром аумағына қоршаудағы саңылау арқылы өткенін көрсеткен.
"Шымкент әуежайы" АҚ жүргізген тергеу нәтижелері бойынша, оқиғаға Қорғаныс министрлігі №55652 әскери бөлімінің жауапкершілік аймағындағы периметрлік қоршау тұтастығының тиісінше қамтамасыз етілмеуі, атап айтқанда, жануардың ұшу алаңына кіруіне жағдай жасаған саңылаудың болуы себеп болған", - деді Шәріпбаев.
Бұл ретте Авиациялық әкімшілік әуежайдың өзі қызмет көрсететін қоршау учаскесі жарамды күйде болғанын, ал анықталған саңылау бүгінде жабылғанын атап өтті.
ҚАӘ олқылық әскери бөлім жауапты учаскеде табылғанын нақтылады. Саңылаудан бөлек, онда авиациялық қауіпсіздік талаптарында көзделген кейбір элементтер: күзет жарығы, бейнебақылау жүйесі және қазуға қарсы құрылғылар болмаған. Тергеу мәліметтері бойынша, осының бәрі жануардың ұшу алаңына еркін кіруіне жағдай жасаған.
Неге ҚАӘ әскери бөлімді тексермеді?Сонымен қатар Авиациялық әкімшілік әскери бөлімге қатысты тексеру жүргізілген-жүргізілмегені туралы айтты. Ведомство мұндай өкілеттіктері жоқ екенін түсіндірді.
"Қазақстанның Авиациялық әкімшілігі" АҚ мемлекеттік авиация субъектілеріне қатысты инспекторлық нұсқамалар беруге, бақылау іс-шараларын жүргізуге және әкімшілік ықпал ету шараларын қолдануға өкілетті емес", - деп атап өтті Шәріпбаев.
Сондықтан №55652 әскери бөлімі Қорғаныс министрлігіне қарасты болғандықтан, оған қатысты тексеру жүргізілген жоқ.
Сонымен бірге ҚАӘ әскери бөлім өкілдерімен қоршаудың жай-күйі мен авиациялық қауіпсіздік мәселелерін ұдайы талқылағандарын хабарлады.
Оқиғадан кейін қандай шаралар қабылданды?"ҚР ҚМ №55652 әскери бөлімі қоршауды тиісті қалыпқа келтіру бойынша белгілі бір жұмыстарды жүргізіп жатыр, алайда аталған ескертулер объективті себептерге, соның ішінде ҚР ҚМ тарапынан қаржыландыру мәселелеріне байланысты қазіргі уақытта толық жойылған жоқ", - деді Шәріпбаев.
Проблемалы учаске талапқа толық сәйкестендірілгенше, әуежай аумақты бақылауды күшейтті.
Авиация әкімшілігі мәліметінше, авиациялық қауіпсіздік қызметі мен жерүсті қамтамасыз ету қызметі қызметкерлерінің патрульдік топтар саны, сондай-ақ аралау жиілігі арттырылды.
ҚАӘ жануарлардың ұшу алаңында пайда болуы ұшу қауіпсіздігіне қатер төндіретінін, сондықтан мұндай жағдайлар жануарлардың аэродром аумағына кіруіне жол беретін себептерді барынша тез жоюды талап ететінін атап өтті.
Әуекомпания не дейді?Әуекомпания тергеуді қолданыстағы авиациялық оқиғаларды тергеу қағидаларына сәйкес "Шымкент халықаралық әуежайы" АҚ жетекшілік ететін комиссия жүргізгенін хабарлады.
Оқиғаның мән-жайы"Тергеу нәтижесі азаматтық авиация уәкілетті органының бақылауында. Тергеу қорытындысын қарау, ресми түсініктеме беру және осы мәселе бойынша шешім қабылдау солардың құзыретіне кіреді", - деп хабарлады FlyArystan өкілдері.
Еске сала кетейік, оқиға 2026 жылғы 15 сәуірде Алматы - Шымкент бағыты бойынша қатынайтын FS7105 рейсі қонғаннан кейін болған.
Сол кезде FlyArystan ұшақ қонғаннан кейін ұшу-қону жолағында болған итке соқтығысқанын хабарлаған еді.
Салдарынан әуе кемесі зақымдалды.
"Соқтығысу салдарынан әуе кемесінің компоненттері зақымдалды. Қазіргі уақытта ауыстырылуы тиіс барлық бөлшек Алматыдан жеткізіледі", - деп хабарлаған еді бұған дейін әуекомпания.
Тасымалдаушы қандай бөлшектер зақымдалғанын нақтыламады.
Оқиғадан кейін материалдар Шымкент станциясындағы көліктегі полиция басқармасында тіркеліп, тексеру басталды. Ол кезде жануар аэродром аумағына қалай тап болғаны хабарланбаған еді. Енді тергеу негізгі себептердің бірін атады - бұл Қорғаныс министрлігі әскери бөлімінің жауапкершілік аймағындағы периметрлік қоршау учаскесінің жай-күйіндегі олқылықтар.
Тағы оқыңыз: Алматы әуежайындағы бұзақылық: екі ер адам рейстен түсіріліп, жазаланды
Google News арқылы жаңалықтарымызды қадағалаңыз
Жазылу