Aikyn.KZ парақшасынан алынған ақпаратқа сәйкес, Qazaq24.com хабарлайды..
Форум барысында Құрылтай депутаттығына кандидаттар «Әділетті болашақ үшін» сайлауалды бағдарламасының негізгі бағыттарын таныстырып, бастауыш партия ұйымдарының сайлау науқанын өткізу мен партия бастамаларын әр өңірде іске асырудағы рөлін талқылады. Бұл туралы Aikyn.kz «Әділет» партиясының баспасөз қызметіне сілтеме жасап хабарлайды.
Партия төрағасы Айбек Дәдебай бастауыш партия ұйымдары партияның негізгі тірегі әрі азаматтармен тұрақты байланысты қамтамасыз ететін басты буын екенін атап өтті.
«Бастауыш партия ұйымдары – партиямыздың халыққа ең жақын бөлігі. Дәл осы жерде азаматтардың сұранысы тыңдалып, ең өзекті мәселелер талқыланып, оларды шешудің жолдары бірлесіп қарастырылады. Партияға деген сенім деңгейі сіздердің күнделікті жұмыстарыңызға тікелей байланысты. Сайлау науқаны кезінде, бастауыш партия ұйымдары партия мен сайлаушылар арасындағы басты байланыстырушы буынға айналып отыр», - деді Айбек Дәдебай.
Одан кейін Құрылтай депутаттығына кандидаттар сайлауалды бағдарламаның негізгі бөлімдерін таныстырды. Бағдарламаның цифрлық бағытын Құрылтай депутаттығына кандидат Бағдат Мусин түсіндірді. Ол жасанды интеллектіні дамыту, дербес деректерді қорғау, халықтың цифрлық сауаттылығын арттыру және заманауи технологияларға қолжетімділікті кеңейту жөнінде баяндады.
«Партия әрбір азамат үшін қорғалған цифрлық кеңістік құруды ұсынады. Бағдарламада бес миллион қазақстандықты жасанды интеллектімен жұмыс істеу дағдыларына оқыту, AI және deeptech салаларында 100 мың маман даярлау, Мамандықтарды трансформациялау ұлттық орталығын құру көзделген. Сонымен қатар, 2027 жылға қарай ауыл тұрғындарының кемінде 97 пайызы сапалы интернетпен қамтамасыз етіледі», - деді Бағдат Мусин.
Әлеуметтік бағыттағы бағдарламаны Құрылтай депутаттығына кандидат Динара Зәкиева таныстырды. Ол бағдарламада бір миллион сапалы жұмыс орнын ашу, оның ішінде ауылдық жерлерде 350 мың жұмыс орнын құру, балабақшаларда 79 мың жаңа орын және мектептерде 300 мың оқушы орны ашу, тоғыз перинаталдық орталық салу, ерекше қажеттілігі бар адамдарға арналған 27 оңалту орталығын құру, сондай-ақ дуальды оқыту мен жұмыспен қамту бағдарламалары арқылы жастардың мүмкіндіктерін кеңейту көзделгенін атап өтті.
Форумға қатысушылар сондай-ақ қызметкерлердің еңбек құқықтарын қорғау, өндірістегі қауіпсіздік, білікті кадрлар даярлау, бизнесті қолдау, инвестициялық ахуалды одан әрі жақсарту және кәсіпкерлікті дамыту мәселелерін талқылады. Бастауыш партия ұйымдарының өкілдері партияны одан әрі дамыту және сайлауалды бағдарламаны іске асыру тетіктерін жетілдіру жөнінде ұсыныстарын ортаға салды.
Қызылорда облысындағы «Тұран» бастауыш партия ұйымының төрағасы Жанарыс Түбекбаев өңірлік хабтарда цифрлық құралдар шеберханаларын ашып, қоғамдық маңызы бар міндеттерге арналған цифрлық шешімдерді әзірлеу үшін студенттер мен жас IT мамандарын біріктіретін цифрлық еріктілер корпусын құруды ұсынды. «Әділетті болашақ» бастауыш партия ұйымының төрағасы Абай Құрманқұлов партия бағдарламасында экономиканың нақты секторын дамыту мен еңбек адамының мәртебесін арттыруға ерекше көңіл бөлінгенін айтты. «Жетітөбе» бастауыш партия ұйымының төрайымы Самал Байкеева халықпен өзара іс-қимылдың заманауи цифрлық құралдарын енгізуді, атап айтқанда, партияның сайлауалды уәделерінің орындалуын бақылауға арналған онлайн жүйе құруды ұсынды. «Қазақстан алюминийі» АҚ бастауыш партия ұйымының төрағасы Виталий Голубенко партияның сайлауалды бағдарламасы еңбек адамының өмір сүру сапасын арттыруға, оның мүддесін қорғауға, лайықты еңбек жағдайларын жасауға және әлеуметтік тұрақтылықты нығайтуға бағытталғанын атап өтті.
Денсаулық сақтау жүйесін дамыту туралы Көпбейінді онкология және хирургия орталығының директоры Гүлмира Сағидуллина баяндады. Жастар атынан «Жас қыран» бастауыш партия ұйымының өкілі Ақан Бесбаев сөз сөйлеп, партияның жастарға арналған бастамалары мен жас азаматтарды қоғамдық өмірге тарту жұмыстары туралы айтты.
Форумды қорытындылаған Айбек Дәдебай бүгінгі таңда партия мүшелерінің саны 800 мыңнан асқанын айтты. Оның сөзінше, бұл – еліміздің барлық өңіріндегі бастауыш партия ұйымдарының жүйелі жұмысының нәтижесі. Сондай-ақ ол бүгінде партияның 20 өңірлік және 226 аумақтық сайлауалды штабы белсенді жұмыс істеп жатқанын еске салды. Ел аумағында сайлауалды бағдарламаны 30 мыңға жуық сенімді өкіл түсіндіріп жүр, ал сайлау науқаны аясында 21 мыңнан астам іс-шара өткізілген.
«Патриотизм, еңбекқорлық, жауапкершілік және прогреске ұмтылыс сияқты құндылықтардың қоғамдық сананың ажырамас бөлігіне айналғаны маңызды. Партиямыздың сайлауалды бағдарламасы дәл осы құндылықтарға негізделген. Біз сайлауға ұранмен емес, жан-жақты пысықталған бастамалармен және нақты міндеттемелермен барамыз. Біздің бағдарламамыз жекелеген өңірлерді емес, тұтас Қазақстанды дамытуға бағытталған», - деді Айбек Дәдебай.
Партия төрағасы сондай-ақ бастауыш партия ұйымдарының ауылдық аумақтарды дамытудағы рөліне арнайы тоқталды.
«Біз тек ауыл шаруашылығын ғана емес, агротуризмді, қызмет көрсету саласын, қолөнерді және халыққа тұрақты табыс әкелетін өзге де бағыттарды дамытуды көздеп отырмыз. Жергілікті жерлердегі партия белсенділері өз өңірінің әлеуетін жақсы білуі, нақты шешімдер ұсынуға дайын болуы және оларды іске асыруға белсенді қатысуы қажет», - деп түйіндеді Айбек Дәдебай.
Форум соңында партия төрағасы «Әділет» партиясының жаңа мүшелеріне партия билеттерін табыстады. Бүгінде еліміз бойынша 3545 бастауыш партия ұйымы тіркелген. Олар 650 мыңға жуық партия мүшесінің басын қосып, партия мен азаматтар арасындағы байланысты қамтамасыз ететін негізгі буын болып қала береді.
Партияның қызметі туралы басқа да жаңалықтарды ресми Telegram-арнамыздан оқи аласыздар: https://t.me/adilet_partiyasy