Төртеудің тартысы қыза түспек

Алдымен АҚШ-тың Инглвуд қала­сын­дағы «Соу-Фай» стадионында өткен тартыс­та Испания құрамасы Бель­гия футболшыларын 2:1 есе­бімен ығыстырып, жарты­лай финалға шықты. 70 мың кө­рерменді еркін сыйдыра­тын стадионда ине шаншар орын болмады. Фабиан Руистің 30-минутта соққан голынан кейін алға ұзаған испандықтар басымдықты уыс­тан шығармады. Бірінші тайм­ның 41-минутында Бельгия құрамасының шабуылшысы Шарль Де Кетеларе таразы басын теңестірген. Алаң­ға 86-минутта шыққан Испа­ния құрамасының жартылай қорғаушысы Микель Мерино араға екі минут салып жеңіс голын соқты. Бель­гия құрамасының шабуыл­шы­сы Тибо Куртуаның жара­қаты сыр беріп, 71-минутта алаңнан кетуі де командалас­тарына айтарлықтай соққы болды. Даңқты қақпашыны алмастырған Сенне Ламменс барын салғанымен ұжымды жеңілістен құтқара алмады. Испания құрамасы жартылай финалда Франция футболшыларына қарсы ойнайды.

Ширек финалдың кезекті тартысы Канзас-Ситидегі (АҚШ) «Эрроухед» стадионында өтті. 2022 жылы Қатарда өткен әлем чемпионатында кубок олжалап, жаһан үздігі атанған Аргентина құрамасы Швейцария футболшыларын экстра таймда жеңді. Матч­тың 10-минутында Лионель Мессидің бұрыштамадан әуе­летіп жеткізген пасын Алек­сис Мак Аллистер бас­пен дәл бағыттап есеп ашты. Швей­цария футболшыларын шең­гелдеп ұстап, басымдықты уыст­ан шығармаған арген­ти­­на­лықтардың қорғанысы ­67-ми­нутта сыр берді. Швей­цария құрамасы ұрымтал сәтті мүлт жібермеді. Сол қапталдан шабуылды өрбіткен Дан Ндой командаласы Рикардо Родиригеске пас беріп, өзі қарсыластың айып алаңына өтіп алды. Рикардо да ала доп­ты жер бауырлата Ндойдың алдына жеткізді. Әлем чемпио­ны атағына ие аргентиналық қақпашы Эмилиано Мартинес еш қайран көрсете алмады. Бұл ойынға португалиялық Жоау Педру Пиньейру қазы­лық етті. 44-минутта ес­керту алған Швейцария құрамасының шабуылшысы Брил Эмболо 71-минутта алаңнан қуыл­ды. Бір ­ой­ын­шысы кем швей­цариялықтар негізгі уақытта тең нәтижені сақтап қалған. Экстра таймда Лаутаро Мартинес 98-минутта екінші голды соқса, Хосе Лопес 114-минутта үшінші голды соғып, командасын жартылай финалға шығарды.

Майамидегі (АҚШ) «Хард Рок» стадионындағы Норвегия мен Англия тартысы 1:2 есебі­мен ағылшындардың пайда­сына шешілді. 36-минутта Андреас Шельдеруптің соқ­қан голы Норвегия құрамасын алға шығарған. Франциялық төреші Клеман Тюрпен бірін­ші таймға қосқан қосымша уақытта Англия құрамасының жартылай қорғаушысы Джуд Беллингем есепті теңестірді. Жеңіс голын да осы Беллингем соқты. Экстра таймның 93-минутында дубль авторы атанып, Англия құрамасы мундиальдің жартылай финалына шықты. Енді олар финалға шығар жолда Аргентина футболшыларымен тартысқа түседі.