134 млн теңге пара: ШҚО да жемқорлық дерегі анықталды

Ұлттық қауіпсіздік комитеті Шығыс Қазақстан облысының Жолаушылар көлігі және автомобиль жолдары басқармасының басшысын ірі көлемде пара алу және лауазымдық өкілеттіктерін теріс пайдалану фактілері бойынша күдікпен ұстады.

ҰҚК мәліметінше, тергеу барысында күдіктінің жол құрылыс компаниялары мен автобус парктері өкілдерінен жалпы сомасы 134 млн теңге көлемінде заңсыз сыйақы алғаны анықталған. Тінту кезінде оның үйінен 121,9 млн теңге және 97,7 мың АҚШ доллары тәркіленді.

Сонымен қатар ШҚО білім саласында сапаны қамтамасыз ету департаментінің басшысына қатысты да қылмыстық іс қозғалды. Ол мұғалімдердің мемлекеттік аттестаттаудан өтуіне жәрдемдескені үшін жүйелі түрде ақша алып отырған деген күдікке ілінді.

Сот санкциясымен аталған тұлғалар қамауға алынды. Қылмыстық-процестік кодекстің 201-бабына сәйкес өзге ақпарат жарияланбайды.

ҰҚК дерегінше, бұған дейін өңірде кәсіпкерлерге қатысты 140-қа жуық заңсыз тексеру жүргізілгені анықталған.