Астана қаласы парақорлық ісі бойынша көш бастап тұр

Фото: Ерлан Омар/egemen.kz

Ranking.kz мәліметінше, 2026 жылдың алғашқы бес айының қорытындысы бойынша елімізде парақорлыққа қатысты 427 қылмыстық іс тіркелген. Бұл өткен жылдың сәйкес кезеңімен салыстырғанда 1,7% көп. Айта кетейік, талдау тек үш бап бойынша жүргізілген: «Пара алу», «Пара беру» және «Парақорлыққа делдал болу».

Қаңтар-мамыр айларында тіркелген қылмыстық істер саны бойынша Астана қаласы көш бастады. Астанада аталған баптар бойынша 56 іс тіркеліп, өткен жылмен салыстырғанда көрсеткіш 21,7%-ға өскен. Сарапшылар мұны орталық мемлекеттік органдардың шоғырлануымен байланыстырады. Екінші орында – Қостанай облысы тұр. Өңірде парақорлыққа қатысты істер саны 3,5 есе өсіп, 38-ге жеткен. Үшінші орынға Алматы қаласы жайғасты – мұнда 32 іс тіркеліп, өсім 14,3 пайызды құрады. Ал ең төмен көрсеткіш Абай (1 іс), Ақмола (2 іс) және Батыс Қазақстан (7 іс) облыстарында байқалды.

Парақорлыққа қатысты қылмыстық істер санының ең жоғары өсімі Алматы облысында тіркелді – көрсеткіш бір жылда 4 есе артқан. Сондай-ақ Қызылорда облысында өсім 66,7 пайызды, Жамбыл облысында 61,1 пайызды құрады.

Керісінше, бірқатар өңірлерде мұндай қылмыстық істер саны айтарлықтай азайған. Атап айтқанда, Солтүстік Қазақстан облысында көрсеткіш 2,1 есе, Павлодар облысында 2,4 есе, Батыс Қазақстан облысында 2,6 есе төмендеген. Ал Ақмола облысында тіркелген істер саны өткен жылмен салыстырғанда 13 есе азайған.

Еске сала кетейік, сенаторлар сыбайлас жемқорлыққа қарсы жаңа заңдарды қабылдады. Жаңа нормаларға сәйкес, енді мемлекеттік қызметшілер мен оларға теңестірілген тұлғаларға қызметтік өкілеттіктерін жеке мүдде үшін пайдалануға қатаң тыйым салынады. Ең маңызды өзгерістердің бірі – енді пара беруге уәде ету, ұсыну немесе талап ету де қылмыстық жауапкершілікке жатқызылатын болды.

Жанбота БАХЫТБЕК,

ЕҰУ студенті