Астанадағы дау: құрылыс салушы Qyran ТК дағы бір пәтерлерді бірнеше сатып алушыға сатып жіберген

Астанада Qyran ТК-дағы пәтерлерді бірнеше адамға қайталап сатып келген құрылыс компаниясы басшылығына қатысты қылмыстық тергеу аяқталды, деп хабарлайды Tengri Home 24.kz арнасына сілтеме жасап.

Поделиться

Жалпы шығын көлемі 4,5 миллиард теңгеден асқан. Қазіргі таңда айыпталушылар қамауда отыр. Алайда зардап шеккендер үшін басты сұрақ әлі де ашық қалып отыр: ақшасын төлеп қойған баспана соңында кімге бұйырады?

Іс материалдарына сәйкес, 51 жеке тұлға және бір заңды тұлға жәбірленуші деп танылды. Ал сатушы ретінде "International Invest Company IIC" ЖШС көрсетілген.

"Пәтер иесімен сатып алу-сату шартын жасастық. Соманы төлеп, мәмілені аяқтадық. Екі күннен кейін eGov арқылы ауыртпалықтардың жоқтығы туралы анықтама алдық. Бәрі дұрыс, пәтер таза, өз атымызға тіркелді. Қоныстанып, қоныстой өткіздік. Ал 2025 жылдың күзінде пәтерге тыйым салынғаны туралы мәселеге тап болдық", - дейді Самат Мәліков.

"2025 жылғы 10 қаңтарда мен үш пәтер сатып алдым. Компанияға қолма-қол ақшамен төледім. Ақшаны компания иелерінің өздері қабылдады. Олар бәрін санап алып, маған үш кепілпұл келісімі мен үш төлем тапсырмасын берді. Содан кейін барлық құжатты - құрылысқа рұқсатты, пайдалануға беру актісін, № 2 нысанды көрсетіп, бәрі заңды екенін, кіріп жөндеу жүргізе алатынымызды айтты", - деп бөлісті Айнагүл Бәкірова.

Елордалық экономикалық тергеу департаменті төрт адамның қылмыстық жауапкершілікке тартылғанын хабарлады. Барлық қаржылық және құқықтық мәселелер, яғни шарттар жасасу мен ақша өткізу сотталушылардың қатысуымен компания кеңсесінде шешілгені дәлелденіп, анықталды.

Олар қаражатты өз шоттарына салған. Бірақ бұл ретте бухгалтерлік немесе банктік жүйеде бұл ақшаның нақты кімдікі екені көрсетілмеген. Құқық қорғау органдарының пайымдауынша, сатушылар осылайша салық төлеуден жалтарған.

Екі жыл бойы олар бір пәтерді бірнеше рет сатып келген. Нәтижесінде оларға сеніп тапсырылған бөтен мүлікті иемдену, аса ірі мөлшердегі алаяқтық, сондай-ақ өз бетінше билік ету баптары бойынша айып тағылып отыр.

Айыптау үкімі шыққан жағдайда, сотталушылар 5 жылдан 12 жылға дейінгі мерзімге бас бостандығынан айырылуы мүмкін. Ал бұғатталған пәтерлерге келетін болсақ, олардың тағдырын да сот шешеді.

Тұрғындар баспаналарын азаматтық тәртіппен қорғауға мәжбүр боламыз ба деп қауіптенеді. Олар пәтерден айырылып қалу қаупі өте жоғары екеніне сенімді. Ал зардап шеккендердің көбі үшін бұл жалғыз жылжымайтын мүлік.

Google News арқылы жаңалықтарымызды қадағалаңыз

Астана тұрғындар баспана пәтер қылмыстық іс