Атырау құрамын Сербия және Гана ойыншыларымен күшейтуі мүмкін

«Атырау» футбол клубы маусымның екінші бөлігі алдында құрамын нығайтуға кірісті. Бұл туралы спорт журналисі Эльдар Аманбаев хабарлады.

Оның дерегінше, команда қарауында төрт жас футболшы бар. «Оқжетпес» пен «Жеңіс» клубтарының қосалқы құрамында ойнаған бұрынғы ойыншыларға өзін көрсету және келісімшартқа қол жеткізу мүмкіндігі берілген.

Сондай-ақ «Атыраудың» ықтимал ойыншыларының бірі — шабуылшы Әліби Мұхит. 22 жастағы форвард «Қайрат» академиясының түлегі, алайда соңғы жарты жылдан астам уақыт бойы ойын тәжірибесі болмай жүр.

Клуб Ганадан келген вингер Жилберт Кумсонды да қарастыруда. Журналистің айтуынша, «Атырау» өкілдері футболшының айналасымен байланысқа шыққан, сондықтан оның командаға қосылу ықтималдығы сақталып отыр.

Telegram-арна «Серый CARDINAL» дерегінше, «Атырау» құрамын сербиялық шабуылшы Джордже Максимович толықтыруы мүмкін. Ол Сербияның «Раднички 1923» клубының тәрбиеленушісі, 2017 жылы негізгі құрамда дебют жасаған. Бұған қоса Индонезия, Грекия, Черногория және Сингапурда ойнаған.

Канал мәліметінше, сербиялық форвард жақын күндері келісімшартқа қол қойып, «Атырауға» ауысады деп күтілуде.

Бүгін, 13:19