Атырауда аналарға арналған Ana Space тынығу бөлмесі ашылды

Атырау облыстық перинаталдық орталығында шала туған және ерекше күтімді қажет ететін нәрестелердің аналарына арналған «Ana Space» атты мейірім мен тыныштық бөлмесі ашылды. Бұл туралы Өңірлік коммуникациялар қызметі хабарлады.

Жобаның мақсаты – ұзақ уақыт бойы емделіп жатқан сәбиінің қасынан алыстай алмайтын аналарға психологиялық қолдау көрсету, олардың демалуына және эмоциялық күшін қайта қалпына келтіруге жағдай жасау.

Жалпы ауданы 21 шаршы метр болатын бөлме қазақтың ұлттық ою-өрнектерімен безендіріліп, заманауи интерьер шешімдерімен толықтырылған.

– Шала туған немесе денсаулығында ақауы бар сәбиін күту – аналар үшін үлкен сынақ. Олар мұнда 1 айдан 6 айға дейін уақыт өткізеді. Сондықтан біз аналардың бір-бірімен тілдесіп, демалып, кітап оқуына, тоқыма тоқуына, үстел ойындарын ойнауына жағдай туғызуды жөн көрдік, – деді жоба серіктесі Меруерт Құлжанова.

Жоба «Жүректен жүрекке» қоғамдық қорының бастамасымен, «Шеврон» компаниясының қолдауымен және корпоративтік волонтерлікті дамыту бағдарламасы аясында жүзеге асырылды.

Бүгін, 12:01