Батыс Қазақстанда бір үйір жылқы далада қалып, үсіп кеткен

АЛМАТЫ, 19 желтоқсан – Sputnik. Батыс Қазақстан облысы Казталов ауданында төтенше жағдай жарияланды, деп хабарлайды Sputnik Қазақстан тілшісі.

Әлеуметтік желіде ауданға қарасты Саралжың ауылындағы шаруа қожалығында үйір жылқы қырылып қалғаны туралы ақпарат тарады. Малдың иесі өлген малды көрсетіп, бейнежазба жариялаған. Бейнеде жылқылардың қарға көміліп жатқан өлекселерін көруге болады. Мал иесі айғырына сеніп қапы қалғанын айтады.

"Бұл жылқылардың иесі мен едім. Әр адам әр түрлі пікір жазып жатыр екен. Менде бұлай болғанын қаламадым. Білсем бір амалын жасар едім. Ақ адал еңбек маңдай термен әкемнің бір бас биеден көбейткен жылқылары еді. Сақа айғыр 15 жылдай үйірде жүрген қандай ауа райы болсын орнында- іздемейсің, қандай қыс болсада үйірді аман алып шығып жүрген жануар соған сеніп қалғаннан да шығар", - дейді қырылған жылқылардың иесі Самғат Болатов.

Аудандық әкімдік бұған дейін шаруаларға малды қамап ұстау туралы бірнеше рет ескертілген дейді.

"Оқиға болған жер Жәнібек ауданымен шекаралас. Жалпы қожалықтарға, жеке тұрғындарға малды қорада қамап ұстау туралы бірнеше рет хабарландыру берілді. Өкінішке орай мал иелерінің салғырттығынан болып отыр. Қазір аудан әкімдігі тарапынан шығын есептеліп жатыр. Ірі қара мен қой санын есептеп жатырмыз. Оның алдында да Нұрәлі қыстағында да қойды қораға емес, шарбаққа қамаған. Содан аязда қырылып қалды", - дейді Қазталов ауданы әкімдігі.

Ведомствоның мәліметінше, қырылған мал саны туралы ақпарат бермейтін шаруалар бар.

"Казталов ауданы әкімінің 15 желтоқсандағы №13 шешімімен Казталов ауданы аумағында жергілікті ауқымдағы табиғи сипаттағы төтенше жағдай жарияланды", - деп жазды әкімдік.