​Бектенов әкімдерге орынбасарларын жауапқа тартуды тапсырды

Премьер-министр Олжас Бектенов Мемлекет басшысының «Жасанды интеллект дәуіріндегі Қазақстан: өзекті мәселелер және оны түбегейлі цифрлық өзгерістер арқылы шешу» атты Жолдауында берілген тапсырмаларды орындау аясында экономикаға инвестиция тарту мәселелері бойынша кеңес өткізді.

Жиында министрліктер мен әкімдіктердің инвестициялық жобаларды іске асыру және өңірлерге қаражат тарту жұмыстарының барысы қаралды.

Ұлттық экономика министрі Серік Жұманғарин мен сыртқы істер министрінің орынбасары Әлібек Қуантыров, сондай-ақ облыс әкімдері мен Бас прокурордың бірінші орынбасары Жандос Өмірәлиев баяндама жасады.

Олжас Бектенов Президент қойған мақсат — 2029 жылға дейін ел экономикасына 150 млрд АҚШ доллары көлемінде шетелдік инвестиция тарту екенін еске салды.

Министрліктің дерегінше, биылғы тоғыз айда негізгі капиталға салынған инвестиция көлемі 13,8 трлн теңгеге жетіп, өткен жылмен салыстырғанда 13,5%-ға артқан. Ең көп өсім энергетика, өңдеу өнеркәсібі, ауыл шаруашылығы және көлік салаларында тіркелді.

Дегенмен, бірқатар өңірлер жоспардан қалып келеді. Атырау, Қарағанды, Ұлытау және Абай облыстарында көрсеткіш төмен. Мысалы, Атырау облысында жоспардың орындалуы — 42,8%, Ұлытауда — 61,5%.

Премьер-министр бұл жағдайды жобаларды іске асырудағы бюрократиялық кедергілер мен мерзімнің кешіктірілуімен байланыстырды.

«Инвестиция болмаса, экономикалық даму да болмайды. Әкімдер мен министрлер бұл мәселемен күн сайын айналысуы керек», — деді Олжас Бектенов.

Сондай-ақ ол инвестиция тартуда артта қалған өңір әкімдеріне жауапты орынбасарларын тәртіптік жауапкершілікке тартуды тапсырды.

Кеңес барысында инвесторлар құқығын қорғау және әкімшілік кедергілерді азайту шаралары да талқыланды. Прокуратура мен Инвестициялық штабтың бірлескен жұмысы нәтижесінде 380 заңсыз тексеру мен 450 әкімшілік іс жүргізудің жолы кесілген.

Қорытындысында Премьер-министр мемлекеттік органдар мен әкімдерге инвестициялық жобаларды уақтылы іске асыруды және инвесторлар үшін қолайлы жағдай жасауды күшейтуді тапсырды.

Бүгін, 17:48