Екі көлікпен соқтығысқан: Алматыда автобус жүргізушісі жол үстінде қайтыс болды

Фото: Depositphotos.com

Департаменттің мәліметінше, қайғылы оқиға көлік көп жүретін жол учаскесінде болған. Қалыпты жағдайда өз бағытымен келе жатқан автобус жүргізушісі кенеттен басқаруға ие бола алмай, жеңіл көліктермен соқтығысқан.

«131-автобустың жүргізушісі Жангелдин көшесімен оңтүстік бағытта келе жатып, Mercedes және Toyota көліктерімен соқтығысқан. Алдын ала дерек бойынша қозғалыс кезінде жүргізушінің жағдайы күрт нашарлап, салдарынан ол көлікті басқара алмай қалған. Өкінішке қарай, жүргізуші көз жұмды», делінген хабарламада.

Оқиға орнына төтенше қызметтер мен тергеу-жедел тобы келді. Қазіргі уақытта жол-көлік оқиғасы бойынша сот-медициналық сараптама тағайындалды. Ол ер адамның нақты өлім себебін анықтауға бағытталған. Оқиғаның барлық мән-жайы анықталып жатыр.

Бұған дейін Астанадағы теміржол өткелінде №30 қоғамдық көлігі пойызбен соқтығысып, полиция автобус жүргізушісін жауапкершілікке тартқаны туралы хабарлаған болатынбыз. 

Сондай-ақ бүгін Атырауда екі автобус соқтығысып, алты адам жарақат алды.