Елде алтын қоры ұлғаяды

Бұған бір себеп - геологиялық барлау жұмыстары нәтижесінде жаңа кен орындары табылды. Алтыннан бөлек, табысы көл-көсір мыс пен мырыш өндірісі де арта түседі. 

Елде кейбір шикізат түрлерін жеңілдікпен беру тәртібі енгізілді. Соның нәтижесінде кәсіпорындардың өндіріс қуаты артып отыр. Осы және өзге де ақпараттарды алдағы минуттарда тарқатып айтамын.

Алтын қоры ұлғайды

Қазақстанда жер қойнауындағы алтын қорының көлемі артты. Өнеркәсіп және құрылыс министрлігінің мәліметіне қарағанда, биыл 2 млн шаршы шақырым аумақта геологиялық барлау жұмыстары жүргізілген. Нәтижесінде, жаңа кен орындары анықталды. Онда жүз тоннаға жуық алтын бар. Сонымен қатар өзге де металл түрлері табылып отыр. Кеніштер мемлекеттік есепке алынды. Геологиялық барлау жұмыстары жалғасып жатыр. Ал келер жылы 2,2 млн шаршы шақырым аумақ зерттеледі. Қарағанды облысында сирек жер металдары бар перспективалы учаске анықталған. Елде қатты күйдегі пайдалы қазбаларды барлау үшін биылдың өзінде 700-ден астам лицензия, ал өндіруге 22 лицензия берілген. 

Цитата: ҚР Өнеркәсіп және құрылыс министрлігі:

- Геологиялық барлау жұмыстарының нәтижесінде алғаш рет бес кен орны мемлекеттік есепке алынды. Олар – Көк-Жон, Алтын-Шоко, Самомбет, Студенттік және Тақыр-Қалжыр кен орындары. Қор көлемі 98 тонна алтынға, 36 мың тонна мысқа, 11 млн тонна марганецке және 1,3 миллион тонна фосфоритке артты.

Геологиялық зертхана кешені салынады

Астанада Ұлттық геологиялық қызметтің зертхана кешені салынады. Оған 14 млрд теңге жұмсалады. Ауқымды жобаны 2028 жылға қарай жүзеге асыру жоспарланып отыр. Сонымен қатар заңнаманы жетілдіру жұмысы назарға алынды. Сенатта тиісті Кодекске цифрлық жер қойнауын пайдалануды және электрондық аукциондарды енгізуді көздейтін түзетулер қаралды. Жаңа инфрақұрылым мен заңнамалық база бірыңғай ғылыми-техникалық платформаны қалыптастыруға және талдау сапасын арттыруға ықпал етеді. Кейінгі жылдары геология саласын цифрландыруға да басымдық беріліп жатыр. Күні бүгінге дейін 3,8 миллионнан астам дерек цифрландырылды. Бұл - 80 жыл ішінде жинақталған геологиялық деректердің 83 пайызы.

Цитата: ҚР Өнеркәсіп және құрылыс министрлігі:

- 2025 жылдың соңына қарай цифрландыруды 97,5%-ға жеткізу жоспарлануда. Ал 2026 жылға қарай деректер толығымен цифрландырылады. Бұл геологиялық ақпараттың ұлттық цифрлық қоймасын құрып, деректерге онлайн режимде жылдам қол жеткізуді қамтамасыз етеді.