Елордада жастарға есірткі зияны түсіндірілді

Есірткі - адам өміріне балта шауып, келешегін күйретеді. Сондықтан жастарды зиянды әдеттер мен қауіпті заттардан арашалау - қоғамның басты міндеттерінің бірі.

Осы мақсатта елордада «Заң және тәртіп» тұжырымдамасы аясында нашақорлыққа қарсы кең көлемді іс-шаралар қолға алынды. «Астана – есірткісіз қала» ұранымен өткен жиында тәртіп сақшылары, дәрігерлер, белгілі қоғам қайраткерлері студенттерге есірткінің зиянын түсіндіріп, өз ақыл-кеңестерімен бөлісті. 

Тұран-Астана университетінің акт залында ине шаншар орын жоқ. Бүгін студенттер нашақорлықтың зияны мен бұл жолға түспеудің маңызы туралы ақпарат тыңдауға келген.

Юлиана Эберле, 3-курс студенті:

- Көп пайдалы ақпарат алдым. Бізбен кездесуге медициналық мекемелердің қызметкерлері келді. Олар бізге есірткіге тәуелді адамды қалай анықтау керегін, тәуелділіктің қандай түрлері болатынын, одан арылу жолдарын түсіндірді. Түрлі танымдық роликтер көрсетті. Бұған дейін нашақорлықтың осыншалықты қауіпті екенін білмеппін.

Студенттермен кездесуге танымал тұлғалар да келді. Бұл қатарда белгілі спортшылар мен өнер жұлдыздары да бар. Қалалық Полиция департаменті жанындағы нашақорлық құқық бұзушылықтардың алдын алу жөніндегі кеңес мүшесі Динара Сәтжанның ойынша, есірткіге тәуелділіктен емдеуден гөрі, оның алдын алған тиімді. Сондықтан жастарға дұрыс таңдаудың маңызын жеткізді.

Динара Сәтжан, тележүргізуші:

- Менің ойымша, ең бірінші - сенің достарың. Мысалы, балаң кіммен араласады? Өйткені жаман компанияға кіріп кетсе, одан ол сау адам болып шықпайды. Екіншісі - студент болса да адамның бос уақыты болады. Сол бос уақытты қайда жұмсайсың? Ол уақытты жұмысқа жұмсау керек.

Қалалық полиция департаменті жыл басынан бері 600-ден астам профилактикалық іс-шара өткізген. Бұл қатарда түрлі дәрістер, акциялар мен спорттық жарыстар бар. Осылайша, жастарды заңсыз есірткі айналымына қатысты қылмыстардан сақтандыру көзделген.

Әлия Қибатқызы, Қалалық Полиция департаменті Есірткі қылмысына қарсы іс-қимыл басқармасының бөлім басшысы:

- Қазір синтетикалық есірткі заттар өршіп келе жатыр деп айтуға болады. Оларды әсіресе, жастарға ұсынып, оларды жарнамалауға тартып жатыр. Ал біз өз тарапымыздан есірткінің зияны туралы, сонымен қатар заңнама жүзінде ең үлкен санкция түрі деп айтамыз ғой. Ол өмір бойына бас бостандығынан айыру санкциясы деп есептеледі. Сондай-ақ бұл қылмыстар заңсыз ақша табумен байланысты болғандықтан бүкіл мүлкі тәркіленеді.

Биыл тәртіп сақшылары қала бойынша 1100-ден астам құқық бұзушылық анықтап, 300-ден астам іс қозғаған. Нәтижесінде жарты тоннаға жуық есірткі заттары тәркіленді.

Авторлары: Серік Селеубайұлы, Санжар Біргебаев