Геологиялық деректердің 97 пайызы цифрландырылды Нағаспаев

— Геология саласында архив деректерін электрондық форматқа көшіру бойынша ауқымды жұмыс істеліп жатыр. Бүгінде геологиялық ақпараттың 97 пайыздан астамы, яғни шамамен 250 терабайт дерек цифрландырылды. Жұмысты жеделдету үшін архив материалдарын автоматты өңдеп, геологиялық модельдер қалыптастыратын жасанды интеллект жүйесі әзірленді, — деді министр.

Оның айтуынша, цифрланған деректер бірыңғай Big Data жүйесінде жинақталады. Қазір жүйеге 1 терабайт дерек жинақталып, олар жасанды интеллект арқылы өңделіп, іріктеліп жатыр.

— Жасанды интеллект координаттарды анықтап, маңызды деректерді іріктейді және жүйелеу уақытын қысқартып, шешім қабылдау сапасын арттырады. Өңделген деректер негізінде жер қойнауы картасы әзірленді. Жүйе ақпаратты ыңғайлы форматта фильтрлеуге, талдауға және перспективті учаскелерді тез анықтауға мүмкіндік береді. Мысалы, экранда Ұлытау облысының интерактивті жер қойнауы картасында жасанды интеллект мыс әлеуеті жоғары учаскелерді автоматты түрде анықтап, көрсеткен. Әр блокты детализациялау барысында жекелеген учаскелер туралы кеңейтілген мәліметтер, соның ішінде геологиялық қабаттың деректерін алуға болады. Осылайша жасанды интеллект шешім қабылдауға қажетті деректерге жылдам қолжеткізуге мүмкіндік береді, — деді Ерсайын Нағаспаев.

Айта кетейік, Үкімет отырысында экономика салаларына жасанды интеллект элементтерін енгізу жайы талқыланып жатыр.