Маңғыстауда жекеменшік процедуралық кабинеттерге барған екі адам қайтыс болды

Биыл тоғыз айда Маңғыстау облысында жеке процедуралық кабинеттерге барған 41 тұрғын анафилактикалық шок алған, оның екеуі көз жұмған. Бұл туралы өңірлік медициналық және фармацевтикалық бақылау департаментінің басшысы Нұрсулу Мұхамбетярова айтты, деп хабарлайды Arasha.kz.

Оның айтуынша, жедел жәрдем қызметінің дер кезінде көрсеткен көмегінің арқасында басқа өлім жағдайларының алдын алу мүмкін болған, деп жазды Lada.kz.

Бір жағдай Мұнайлы ауданының Қызылтөбе ауылында болған: ер адам дәріханадан антибиотик сатып алып, сол жердегі процедуралық кабинет қызметін пайдаланған. Инъекциядан кейін жағдайы күрт нашарлап, жүрегі тоқтаған. Жедел жәрдем келгенше пациент қайтыс болғаны анықталған.

Тексеру барысында кабинетте медициналық қызметке рұқсат беретін лицензияның жоқтығы, дәріні дәрігер тағайындауынсыз егу, аллергиялық сынаманың жүргізілмеуі және дәрілердің сақтау ережесін бұзу деректері анықталған. Сондай-ақ қызметкердің мамандық сертификаты болмаған. Материалдар полицияға жіберіліп, сотқа дейінгі тергеу басталған.

Денсаулық сақтау министрлігінің тапсырмасымен және облыс әкімдігінің қолдауымен «Маңғыстау Адалдық Алаңы» жобалық кеңсесі заңсыз жұмыс істеп жатқан кабинеттерді анықтау үшін қоғамдық мониторингтік топтар құрды.

Нұрсулу Мұхамбетярова атап өткендей, заң бойынша «процедуралық кабинет» тек емханалардың құрамында, учаскелік дәрігерге бекітілген халыққа қызмет көрсету үшін ғана ашыла алады.

Қыркүйекте Ақтауда 46 жеке процедуралық кабинет анықталып, олардың алтауына әкімшілік айыппұл (жалпы сомасы — 1 млн теңгеден астам) салынған. Бірқатары жұмысын өз еркімен тоқтатып, лицензиясынан бас тартқан.

Осындай тексерістер жуырда Мұнайлы ауданында, Жаңаөзенде және өзге аудандарда жалғаспақ.