Маңғыстауда теміржол вокзалында жолаушы қайтыс болды

Маңғыстау вокзалында Маңғыстау - Орал бағытындағы пойызға міну кезінде ер адамның денсаулығы күрт нашарлап, көз жұмды. Осыған байланысты пойыз жолға кешігіп шықты, деп хабарлайды Tengri Travel Lada.kz-ке сілтеме жасап.

Ер адамның денсаулығы пойызға мінер алдында нашарлаған

Қайғылы оқиға 3 қыркүйекте болды. Ер адам Маңғыстаудан Оралға қатынайтын №613 пойызға мінбек болған.

"Жолаушылар тасымалы" АҚ мәліметінше, жолаушының жағдайы вагон жанында кенет нашарлаған. Пойыз қызметкерлері дереу жедел жәрдем шақырып, оқиға туралы полиция мен станция кезекшісіне хабарлаған.

Дәрігерлер оқиға орнына жеткенімен, ер адамды аман алып қалу мүмкін болмады.

Оқиғаға байланысты пойыз белгіленген уақытынан кешігіп шықты. Оқиға орнында құқық қорғау органдарының қызметкерлері де жұмыс істеді.

Өлім себебі туралы басқа мәліметтер әзірге белгісіз.

Бұған дейін "Жолаушылар тасымалы" АҚ баспасөз қызметі жолаушы өзін жайсыз сезінсе, ең алдымен бұл туралы жолсерікке немесе пойыз бастығына хабарлау қажеттігін ескерткен болатын.

"Пойыз жолсеріктері алғашқы көмек көрсетуге және стандартты емес жағдайларға жедел әрекет етуге үйретілген. Олар жолаушыға алғашқы медициналық көмек көрсете алады. Сонымен қатар жолсерік жолаушылар арасында дәрігерлер бар–жоғын анықтай алады", - деп хабарлады баспасөз қызметі.

Сондай-ақ әр пойызда алғашқы көмек көрсетуге арналған медициналық құралдармен жабдықталған дәрі қобдишасы бар екені нақтыланды.

"Төтенше жағдайларда жолсерік жедел жәрдемді жақын маңдағы станцияға шақырады, онда мамандар медициналық көмек көрсетеді. "Жолаушылар тасымалы" АҚ созылмалы аурулары бар жолаушыларға пойызға мінерде барлық қажетті дәрі-дәрмекті алып алуды ұсынады. Сонымен қатар ұзақ сапарға шықпас бұрын емдеуші дәрігерден кеңес пен рұқсат алу керек", - деп толықтырды баспасөз қызметі.

Егер вокзалда адамның жағдайы кенет нашарласа, оны ауруханаға өз бетіңізше жеткізуге тырыспаңыз. Дереу жедел жәрдем шақырып, вокзал қызметкерлеріне немесе пойыз бригадасына хабарлаңыз.

Егер адам ес-түссіз жатса, тыныс алмаса немесе тамыр соғысы білінбесе, мүмкіндігінше тез арада жедел жәрдем шақырып, дәрігерлер келгенше диспетчердің нұсқауларын орындау керек.

Егер адамның жағдайы нашарлап, бірақ ол есін білсе, оны қауіпсіз жерге отырғызған немесе жатқызған дұрыс және оны жалғыз қалдыруға болмайды.

Бұған дейін осыған ұқсас қайғылы жағдай Астанадан шыққан пойызда болған еді. Жүрегіне ота жасатқан ер адам жұбайымен бірге үйіне қайтып бара жатқанда жағдайы күрт нашарлап, вагонда көз жұмды.

Google News арқылы жаңалықтарымызды қадағалаңыз