Ақтөбеден Алматыға ұшып шыққан ұшақта жолаушы қайтыс болды

Желіде Scat әуекомпаниясының Алматыға шыққан ұшағы Ақтөбе әуежайына қайта оралғаны туралы ақпарат тарады. Оған себеп – ұшу барысында жолаушыларының бірінің жағдайы күрт нашарлап кеткен, - деп хабарлайды Aikyn.kz Tengritravel.kz-ке сілтеме жасап.

Әуекомпания мәліметінше, DV712 Ақтөбе – Алматы рейсі кезінде бір жолаушының "денсаулығы кенеттен нашарлаған".

"Экипаж медициналық хабарлау рәсімін бастады және алғашқы көмек көрсетуге кірісті. Дәрігер-кардиологты қоса алғанда, медициналық білімі бар жолаушылар да бортсеріктермен бірге реанимациялық шараларды жүргізді", – деп хабарлады баспасөз қызметі.

Әуе кемесінің командирі әуежайға қайту туралы шешім қабылдағаны нақтыланды.

"Қонғаннан кейін жолаушыны шұғыл медициналық жәрдем бригадасына тапсырды, олар реанимациялық шараларды жалғастырды және кейін оның қайтыс болғанын растады", – деді компания өкілдері.

Баспасөз қызметі ұшу жағдайында жолаушыға көмек көрсету үшін "барлық мүмкін шаралар жасалғанын" атап өтті.

"Әуе компаниясы жолаушының туған-туыстары мен жақындарына шын жүректен көңіл айтады", – деді тасымалдаушы.