Несие аларда нені ескеру керек: мамандар 7 кеңес берді

Қазақстандықтарға несие рәсімдеу кезінде шарт талаптарын мұқият оқуға кеңес берілді. Бұл туралы ҚР Қаржы нарығын реттеу және дамыту агенттігі мәлімдеді.

Мамандардың айтуынша, қарыз шарттарын толық түсінбей қол қою кейін қаржылық қиындықтарға әкелуі мүмкін. Осыған байланысты агенттік азаматтарға бірнеше маңызды жайтқа назар аударуды ұсынады.

Ең алдымен, шарттың басты бетін мұқият оқу қажет. Онда қарыз сомасы мен мерзімі, сыйақы мөлшерлемесі, жылдық тиімді сыйақы мөлшерлемесі, өтеу әдісі, сондай-ақ айыппұлдар туралы негізгі ақпарат көрсетіледі.

Сондай-ақ несиенің толық құнын алдын ала есептеген жөн. Ай сайынғы төлемдерден бөлек, комиссиялар мен сақтандыру төлемдерін ескеру маңызды.

Қарыз алушыларға өтеу әдісін дұрыс таңдау да ұсынылады. Аннуитеттік төлемдер кезінде ай сайынғы төлем бірдей болса, сараланған әдісте төлем мөлшері уақыт өте азаяды.

Бұдан бөлек, несие мерзімі ұзарған сайын артық төлем көлемі артатынын ескеру қажет. Мерзімінен бұрын өтеу шарттары мен мүмкін болатын комиссияларды нақтылап алған дұрыс.

Айыппұлдар мен қосымша төлемдерге де назар аудару керек. Төлемді кешіктірген жағдайда қандай өсімпұл есептелетіні шартта көрсетіледі.

Сарапшылар дербес деректердің дұрыс толтырылғанына көз жеткізіп, оларды өңдеу тәртібімен танысуды да ұсынады. Сонымен қатар төлем кестесі мен қосымша құжаттар несие шартының ажырамас бөлігі екенін ұмытпау қажет.

Агенттік өкілдері шартқа қол қоймас бұрын барлық сұрақтарды нақтылап алуға кеңес береді. Себебі несие міндеттемелерін орындамау кредиттік тарихқа кері әсер етеді.

Айта кетейік, Қазақстанда 19 наурыздан бастап тұтынушылық несие берудің жаңа ережелері күшіне енді. Енді төлемді 30 күннен астам кешіктірген азаматтарға жаңа несие алу шектеледі. Бұған дейін бұл мерзім 90 күн болған.