Қайрат Қожамжаров Ресей азаматтығын алып үлгерген

Қазақстандықтар жаппай қымбатшылық жағдайында күн көріп жатқанда, өткеннің күмәнді істері ұмыт бола бастағандай. Ал сол істерге қатысы бар кейбір тұлғалар осы сәтті пайдаланып, ескі байланыстарын қайта жандандырып, әділ соттан жалтаруға тырысқан сияқты, деп хабарлайды Arasha.kz.

Ulysmedia.kz мәліметінше, Қаржы полициясының бұрынғы басшысы, бұрынғы сенатор және кезінде жоғары лауазымдарды иеленген Қайрат Қожамжаров Ресей азаматтығын алып алған.

Бұрын ықпалды болған қазақстандық шенеуніктер мен күштік құрылым өкілдерінің өз істерін алыстан бақылауға көшуі қазір үйреншікті жағдайға айналды. Мұхтар Әблязов, Виктор Храпунов, Бергей Рыскалиев... Тергеу басталмай жатып елден кеткендері қаншама?

Солардың жолымен Қайрат Қожамжаров та кеткен сияқты. БАҚ жариялаған ақпараттарға сенсек, ол сенатор қызметінен кеткен соң, 2023 жылдан бері Мәскеуде тұрып жатыр.

Көрсетілгендей, құқық қорғау органдарының оған қатысты сұрақтары сол кезеңде туындаған болуы мүмкін. Өйткені Қайрат Пернешұлы – салмақты тұлға, ал ондай адамға айып тағу үшін апта ішінде жинала салмайтын, нақты әрі бұлтартпас дәлелдер қажет.

2024 жылдың ортасынан бастап бірінен соң бірі Қайрат Қожамжаровқа жақын адамдар қылмыстық қудалау орбитасына түсе бастады: әуелі оның бауыры Дулат, кейін бұрынғы серіктестері Талғат Татубаев пен Олеся Кексель ұсталды.

2025 жылдың қыркүйегінде Қазақстан Бас прокуратурасы ақыры Қайрат Қожамжаровтың өзіне қатысты қылмыстық іс қозғалғанын растады.

Ведомствоның тұжырымдары өте жалпы сипатта болды: «қызметтік өкілеттігін асыра пайдалану», «қылмыстық жолмен алынған қаражатты заңдастыру». Қылмыстардың жасалған кезеңі де нақты көрсетілмеді.

Ал журналистер Қайрат Пернешұлы тергеуге шақырылды ма, жоқ па, қандай бұлтартпау шарасы қолданылды деген сұрақ қойғанда, Бас прокурордың орынбасары Ғалымжан Қойгелдиев:
– Барлығы әзірге сотқа дейінгі тергеу сатысында, басқа ақпарат бере алмаймын, – деп қысқаша жауап берді.