Қайрат Жолдыбайұлы шешім қабылдаудың үш қағидасын айтты

Қайрат Жолдыбайұлының айтуынша, қазіргі ата-аналар жиі жіберетін қателіктің бірі – баланың өмірін өз қалауынша бағыттау.

– Көп ата-ана өз орындалмаған арманын баладан көргісі келеді. «Мына факультетті таңда, болашақта дәрігер боласың, мұнайшы боласың» деп баланың еркін шешімін шектейді. Бірақ балаға таңдау еркіндігін беру – ең маңызды нәрсе, - деді ол.

Ол қазіргі мектептерде кәсіби бағдар беруге арналған бағдарламалар бар екенін атап өтті. Мұндай жүйе баланың қабілеті мен қызығушылығын анықтауға мүмкіндік береді.

– Қарапайым киім таңдауда да еркіндік керек. «Міне, бюджетің – осы, қалағаныңды ал» деп үйрету керек. Бала бір рет қателеседі, бірақ сол арқылы шешім қабылдауды үйренеді. Өмір бойы өз ісіне сенімді болуды қазірден бастау қажет, - деді теолог.

Қайрат Жолдыбайұлының айтуынша, баланың шешім қабылдауға дағдыланбауы кейін өз бетінше өмір сүруге кедергі болады.

– Кейбір ересектер әлі күнге дейін киім таңдай алмайды, себебі бала кезінде олардың орнына ата-анасы шешім қабылдап келген. Мұндай адам өмір бойы біреудің мақұлдауын күтіп өтеді, - деді ол.

Кездесу барысында спикер эмоционалдық интеллект пен ішкі тепе-теңдік туралы да айтты. Ол жастарды қандай да бір шешім қабылдайтын кезде эмоция жетегінде кетпей, сабырмен ойлануға үндеді.

– Адам ашулы не қатты қуанып тұрғанда шешім қабылдамауы керек. Сол сәтте кідіріп, сабырға келу маңызды. Эмоциямен қабылданған шешімнің соңы өкінішке әкелуі мүмкін. Өз сезіміңді тани білуің керек, - деді ол.

Сондай-ақ, теолог шешім қабылдаудың басты қағидаларын атап өтті:

• Кідіріс жасау – эмоциядан арылған соң ғана шешім қабылдау.

• Білімге сүйену – мәселені зерттеу, білетін адамдармен ақылдасу.

• Жүрекке үңілу – ар-ождан мен мейірімге сүйену.

– Шешім қабылдарда тек ақылмен емес, жүрекпен де ойлану керек. Кейде жүректің үні дұрыс жолға салады. Тіпті шешімің дұрыс болмай шықса да, өкінбе. Себебі сол арқылы өмір саған сабақ береді. Бұл да – тағдыр, - деп түйіндеді Қайрат Жолдыбайұлы.

Еске салайық, бұған дейін Meloman/MARWIN дүкендер желісі 2025 жылғы 1–31 қазан аралығында өзінің барлық қалалардағы дүкендерінде дәстүрлі BOOKFEST 2025 кітап фестивалінің өтетінін хабарлаған еді.

BOOKFEST кітап фестивалі Meloman/MARWIN желісі тарапынан 2020 жылдан бері өткізіліп келеді және осы уақыт ішінде Қазақстандағы ең ірі кітап индустриясына айналды. Жыл сайын фестиваль оқырмандарды, авторларды, баспагерлерді және кәсіпкерлерді біріктіріп, диалогқа, білім алмасуға және оқу мәдениетін ілгерілетуге арналған кеңістік қалыптастырады.