Қарашығанақ дауы: мұнай компаниялары 2 4 млрд долларды қайтаруы ықтимал

Қарашығанақ кен орнын игеріп отырған ірі мұнай компаниялары халықаралық арбитражда ішінара жеңіліп, Қазақстанға 2-4 млрд доллар көлемінде өтемақы төлеуі ықтимал.
Бұл туралы Bloomberg агенттігі дереккөздерге сілтеме жасап хабарлады.

Арбитраж трибуналы Қарашығанақ жобасының операторлары мемлекет есебінен келісімде көзделмеген шығындарды заңсыз өтегенін анықтаған. Қазақстан үкіметі бастапқыда 6 млрд доллардан астам өтемақы талап еткен.

Іс Қазақстан үшін ішінара жеңіс ретінде бағаланып отыр. Шешімге сәйкес, Eni, Shell, Chevron, «Лукойл» және «ҚазМұнайГаз» қатысатын консорциум артық өтелген шығындарды өндірілген мұнайды бөлу тетігін өзгерту арқылы қайтаруы мүмкін.

Арбитраж Лондонда Стокгольм арбитражы ережелері бойынша жабық форматта өткен. Қазіргі таңда Eni мен Shell шешімге шағымдану мүмкіндігін қарастырып жатыр. Қазақстанның Энергетика министрлігі мен бірқатар компаниялар пікір білдіруден бас тартты.

Айта кетейік, Қарашығанақ жобасына қатысты талап-арыз 2023 жылы берілген. 2024 жылы шетелдік компаниялар дауды газ өңдеу зауытын салу арқылы реттеуді ұсынған.