Қазақстан күрес федерациясына жаңа президент сайланды

Бұл туралы шешім республикалық қоғамдық бірлестіктің жылдық қорытынды конференциясында қабылданды.

Жиында 2025 жылғы жұмыс нәтижелері, ұлттық құрама командалардың халықаралық жарыстардағы көрсеткіштері және 2026 жылға арналған міндеттер талқыланды. Сондай-ақ федерация президентін сайлау өтті.

Конференция қатысушыларының шешімімен федерацияның жаңа президенті болып Еркін Оқасов сайланды.

"Күрестің туын түсірмей, қазақ спортын әлемге асқақтата беру үшін бар күш-жігерімді саламын. Сенім білдірген барша жанға алғыс айта отырып, өздеріңіздің қолдауларыңыз арқылы талай белесті бірге бағындырамыз деп сенемін!", - деді Еркін Оқасов.

Еркін Оқасов — Батыс Қазақстан облысының тумасы. Ол — кәсіпкер, "ВД Строй-Инжиниринг" ЖШС бақылау кеңесінің төрағасы. Бұған дейін Qazaq kuresi қауымдастығының вице-президенті қызметін атқарған.

Еске салайық, мұның алдында Дәулет Тұрлыханов Қазақстан күрес федерациясының президенті қызметінен кеткенін хабарлаған едік.