Қазақстанда цифрлық теңгенің құқықтық мәртебесі заңмен бекітіледі

Қазақстанда цифрлық теңгенің құқықтық мәртебесі заң жүзінде айқындалмақ. «Банктер және банк қызметі туралы» жаңа заң жобасында цифрлық қаржы активтерін реттеу тетіктері енгізіліп, цифрлық теңге ресми түрде қаржы жүйесінің бір бөлігі ретінде танылмақ.

Заң жобасында цифрлық қаржы активтерінің үш түрі қарастырылған:

Ақша талап ету құқығын куәландыратын цифрлы активтер (стейблкоиндар); Негізгі активпен қамтамасыз етілген цифрлы қаржы активтері; Цифрлы түрде шығарылған қаржы құралдары.

Бұл өзгерістер цифрлық экономиканың құқықтық негізін нығайтып, қаржы нарығындағы инновациялық шешімдерге жол ашады.

Сонымен қатар, заң жобасы банктерге цифрлық технологиялар, электрондық коммерция, киберқауіпсіздік, биометрия, жасанды интеллект және телекоммуникация салаларында жұмыс істейтін жаңа финтех компанияларға инвестиция салуға мүмкіндік береді.

Сарапшылардың пікірінше, бұл бастама Қазақстанның қаржы секторын цифрландыруды жеделдетіп, халықаралық тәжірибеге жақындатады.

Бүгін, 13:38