Қызылордадағы ескі автовокзалды жалға алушылар неге ашуға мінді

Сәуле Өмірзақова қаланың Жеңіс көшесі бойында орналасқан автовокзалда оншақты жылдан бері сауда жасап, нәпақа тауып жүр.

Алайда сол жағалауда жаңа сапаржай қалай салынды, содан бері құзырлы органдар тыным бермейтін болған. 

— Төтенше жағдайлар, санитарлық-эпидемиологиялық қадағалау саласының өкілдері қайта-қайта тексеретін болды. Бізден жаңа автовокзалға көшуді талап етеді. Алайда осы жерге үйреніп қалған біз — кәсіпкерлер де, жолаушылар да ол жаққа барғымыз келмейді. Өйткені сол жағалауға жету қиын, таксидің бағасы ұшып тұр, — деді ол.

Кейіпкеріміздің сөзін өзі сияқты автовокзалды жалға алып, бала-шағасын асырап жүрген Мария Тоғызбаева, Жәмила Тайманова, Асылгүл Мүсірәлиева, Эльмира Әбенова, Алмагүл Ақбергенова сынды кәсіпкерлер де қостады.

Олар ескі болса да бұл нысанда санитарлық нормалар мен өрт қауіпсіздігі талаптарының толық сақталғанын, ал негізсіз тексерулер тек қысым көрсетіп, ілік іздеу мақсатында ұйымдастырылғанын жеткізді. 

Ал жолаушы тасымалдайтын көлік иелері мен жүргізушілері жергілікті полицияның тексеруінен көз ашпай отыр.

Осыны айтып құзырлы орындарға хат жолдаған. Шағым иелері қаланың орталығынан тым қашық сапаржайға қатынау өздері үшін де, жолаушылар үшін де тиімсіз деп есептейді. 

— Мысалы, Қызылордадан Шиелі ауданының орталығына жету құны — 1200 теңге. Ал қаланың негізгі бөлігінен сол жағалауға такси 1500 теңгемен апарады. Қызылордадан Шымкентке дейін билет — 4000 теңге, қаланың Шанхай бөлігінен жаңа автовокзалға 3500 теңгеге такси жалдайсыз. Бұл жолаушылардың ашуын келтіреді, — делінген хатта.

Жолаушылар көлігі және автомобиль жолдары басқармасы Автомобиль көлігі туралы заңның 14-бабы 2-тармағының 5-тармақшасына сәйкес автовокзалдардың қызметті бастағаны немесе тоқтатқаны туралы ғана хабарламаларды қабылдайтынын атап өтті. 

— Автомобиль көлігі туралы заңның 19-бабы 3-тармағының 4 және 4-1-тармақшаларына сәйкес автовокзалдар, автостанциялар және жолаушыларға қызмет көрсету пунктері қызмет көрсету кезінде жолаушылар мен багажды автомобиль көлігімен тасымалдау қағидалары талаптарының орындалуын, тасымалдаушылар көрсететін қызметтердің, автовокзалдар, автостанциялар және жолаушыларға қызмет көрсету пунктері қызметтерінің ұлттық стандарттарға сәйкестігін тексеру құзыреті уәкілетті органдарға жүктелген. Осы орайда автомобиль көлігіндегі кәсіпкерлік субъектілерін тексеру жергілікті атқарушы органның, яғни басқарманың құзырына жатпайды. Басқарма тарапынан облыстағы автовокзалдар, автостанциялар және жолаушыларға қызмет көрсету пунктерінің қызметіне тексеру жүргізілмейді, — деді басқарма басшысы Жәнібек Сыздықов. 

Ресми жауапта былтыр сәуірде қаланың сол жағалауында бой көтерген жаңа автовокзал ғимаратының артықшылықтары тізілген.

— Бір уақытта 200 жолаушыны қабылдай алады, халықаралық Батыс Еуропа — Батыс Қытай автожолына жақын, тасымалдаушылар мен жолаушылар үшін ыңғайлы жерде. Заманауи құрал-жабдықтармен және арнайы қызмет көрсету пунктерімен қамтылған. Қазіргі уақытта халықаралық, облысаралық, ауданаралық және қалаішілік бағыттар бойынша 164 автобус маршруты ұйымдастырылған. Автовокзал аймағы жол қауіпсіздігі мақсатында үлкен көлемді автобустар қозғалысына арналған 4 жолақты автомобиль жолымен қамтамасыз етілген. Жолаушылардың қала ішінде жүріп-тұруына ыңғайлы болуы үшін бірнеше бағыттан 49 қалаішілік қоғамдық көлік қатынайды, — деді Жәнібек Сыздықов. 

Сол жағалауда басқа да әлеуметтік нысандар мен тұрғын үйлердің аз еместігі келтірілген. Ал екінші автовокзал — «Салтанат» ЖШС көрсететін қызмет түрлері туралы ақпаратты кәсіпкерлік нысанының басшылығынан алуға болатынын қаперге салыпты. 

Біз сөйлескен автовокзалды жалға алушылар жылы орнымыздан айырылып қаламыз ба деп қорқады. Ал жаңа сапаржайға көшіп баруға қарсы.  

— Басқа қалалардағы сияқты неге екі, тіпті одан да көп автовокзал болмасқа?! — дейді олар.

Облыстық кәсіпкерлер палатасы автовокзал мәселесі бойынша ешқандай шағым түспегенін мәлімдеді. 

Еске салсақ, бұған дейін біз сол жағалаудағы жаңа автовокзал халықтың талап-тілегі мен сұранысына сай бюджет қаржысы есебінен 975 млн теңгеге салынғанын жазғанбыз.