Rolls Royce, Bentley және БАӘ дегі пәтерлер: Заңсыз ломбард иесінің мүлкі бұғатталды

Қаржылық мониторинг агенттігі еліміздің қаржы нарығын дүр сілкіндірген ірі қылмыстық схеманың бетін ашып, С.С. Койнов пен оның сыбайластарына қатысты тергеу амалдарын аяқтағандарын мәлімдеді, деп хабарлайды Arasha.kz.

Бұл істің ауқымы мен айла-шарғысы заманауи экономикалық қылмыстардың қаншалықты күрделі сипат алғанын көрсетіп отыр. Тергеу барысында анықталғандай, комиссиялық дүкендер желісі болып бүркенген ірі ломбардтар жүйесі ұзақ уақыт бойы халыққа заңсыз микрокредит берумен айналысқан.

Оқиғаның мән-жайына үңілсек, «Актив Ломбард» желісінің иесі С.С. Койнов заңды айналып өтудің ерекше тәсілін ойлап тапқан. Ол өз бақылауындағы негізгі компаниядан бөлек, сенімді тұлғалардың атына тіркелген «One Billion Sales», «The Best Seller» және «Shark in Sales» секілді бірнеше заңды тұлғалар желісін құрған. Бұл кәсіпорындар сырт көзге «Актив Маркет» бірыңғай брендімен комиссиялық сауда жасап жатқандай көрінгенімен, іс жүзінде азаматтардың мүлкін кепілге алып, жоғары пайызбен несие үлестірумен айналысқан. Қылмыстық топтың қулығы сол, комиссиялық бөлімшелер мен ломбард филиалдары бір ғимаратта орналасып, клиенттерге бірдей қызметкерлер қызмет көрсетіп келген.

Азаматтардың құқығын таптаған бұл жүйенің ең сорақы тұсы — несие мөлшерлемесінің тым жоғары болуында. Тәулігіне 2,07%-ға дейін жеткен сыйақы мөлшері заңды нормадан бес есе асып түскен. Осындай әдіспен 1,9 миллионнан астам жалған шарт жасалып, қылмыстық жолмен табылған табыс көлемі 19 миллиард теңгеден асып жығылды. 

Табылған орасан зор қаражаттың ізін жасыру үшін Койнов көп деңгейлі заңдастыру схемасын іске қосқан. Ол банк шоттары арасындағы күрделі аударымдар мен «Zeus Co» атты жалған IT-компанияның ойдан шығарылған қызметтерін пайдалана отырып, 7 миллиард теңгеден астам ақшаны дивиденд ретінде жеке меншігіне шығарып алған.

Қазіргі таңда сот санкциясымен басты күдіктінің 8,9 миллиард теңге тұратын барлық мүлкіне тыйым салынды. Бұл тізімде елордадағы сәнді пәтерлер мен үйлерден бөлек, Біріккен Араб Әмірліктеріндегі элиталық апартаменттер және Rolls Royce, Bentley, Mercedes-Benz секілді қымбат темір тұлпарлар бар. Сондай-ақ, депозиттік шоттардағы 2,7 миллиард теңге де бұғатталды. С.С. Койнов қамауға алынып, оның сыбайластарына қатысты тиісті шектеу шаралары қолданылды. Бұл іс халықтың сенімін теріс пайдаланып, заңсыз байығысы келгендерге берілген қатаң ескерту іспетті.