“Бұл қателік еді“ полиция жүргізушілерді тоқтата ала ма, ІІМ түсіндірді

Қазақстан полициясының көлікті заңда көзделген жағдайларда тоқтатуға әрқашан құқығы болған. Дегенмен біраз уақыт бойы ішкі бұйрық патрульдік полициядан заңбұзушылықтарды тек қозғалыс кезінде ғана анықтауды талап етіп келді. Ішкі істер министрлігі мұндай тәсілдің қате болғанын мойындады, - деп хабарлайды Tengrinews.kz тілшісі.

Бұл туралы Үкіметте өткен брифингте ішкі істер министрінің орынбасары Игорь Лепеха мәлімдеді.

"Құқық бұзушылықтарды тек қозғалыс кезінде анықтау туралы бұйрық қолданыста болды. Тәжірибе көрсеткендей, бұл қателік екен. Мұндай тәртіп жол полициясының жұмысын айтарлықтай қиындатты, сондықтан біз одан бас тарттық", - деді Лепеха.

Ол мысал ретінде қиылыста тұрған полицейдің бағдаршамның қызыл түсіне өтіп кеткен көлікті көрген сәтін келтірді.

"Сонда қызметкер көлігіне мініп, жүргізушіні қуып жетіп, содан кейін ғана жауапқа тартуы керек болып шықты. Немесе жүргізуші тасжолда рұқсат етілген 140-тың орнына сағатына 150 шақырым жылдамдықпен келе жатыр делік. Полицей оны қуып жету үшін жылдамдықты сағатына 170 шақырымға дейін арттыруына тура келетін еді", - деп түсіндірді министрдің орынбасары.

Енді патрульдік полиция қызметін қозғалыс кезінде де, стационарлық түрде де атқара алады. Бұл ретте, Лепеханың айтуынша, полицияның көлікті тоқтату құқығы бұрыннан болған.

Автокөлікті тоқтату негіздері "Жол жүрісі туралы" заңның 52-бабында көрсетілген. Олардың қатарында - құқық бұзушылық жасау, қылмысқа қатысы бар деген күдік, жедел-профилактикалық іс-шараларды өткізу және стационарлық бекеттерде құжаттарды тексеру бар.

Лепеха полицияның мақсаты көп айыппұл жинау емес екенін баса айтты.

"Біз фискалдық ұйым емеспіз. Біздің міндетіміз - құқық бұзушылықтың алдын алу және жолын кесу", - деді ол.

ІІМ мәліметінше, елдегі жол ережесін бұзу оқиғаларының 67 пайызы автоматты жүйелер арқылы тіркеледі. Алматы мен Астанада бұл көрсеткіш 70 пайыздан асады.

2017 жылы жаяу полиция жасақтарына стационарлық бекеттерден тыс жерде көліктерді тоқтатуға тыйым салынған болатын: заңбұзушылықтарды автопатрульдеу режимінде анықтау міндеттелді. Сонымен қатар, ІІМ құқықбұзушылықтың куәсі болған полицейдің кез келген жағдайда әрекет етіп, көлікті тоқтатуға міндетті екенін түсіндірген еді.

Сондай-ақ ІІМ көлікті себепсіз тоқтатуға тыйым салынғанын еске салды. Егер жүргізуші полицейдің іс-әрекетінің заңдылығына күмән келтірсе, 102 нөміріне қоңырау шала алады немесе тоқтату туралы шешім бойынша жоғары тұрған лауазымды тұлғаға шағымдана алады.

Бізді Google-дың негізгі дереккөздер тізіміне қосыңыз