Жарнама үшін көліктен басын шығарған жолаушы жазаланды

АСТАНА, 22 қыркүйек – Sputnik. Шығыс Қазақстан облысында жарнамалық ролик түсіру кезінде жол қозғалысы ережесін бұзғандар жауапқа тартылды, деп хабарлады Ішкі істер министрлігі.

Дүкенге арналған жарнамалық бейнеролик түсіру кезінде көпшіліктің назарын аударып, әсерлі кадр жасау мақсатында жүріп бара жатқан көліктен жолаушы басын шығарған.

Полиция қызметкерлері бейнероликке қатысушыларды жедел анықтап, олардың әрекеттеріне құқықтық баға берді.

"Көлік жүргізушісі жолаушыларды тасымалдау қағидаларын бұзғаны үшін әкімшілік жауапкершілікке тартылды. Сонымен қатар қозғалыс кезінде көліктен басын шығарған жолаушыға да әкімшілік шара қолданылды", - дейді полицейлер.

Полиция мұндай әрекеттер жол қозғалысына қатысушылардың өмірі мен денсаулығына қауіп төндіріп, ауыр зардаптарға әкелуі мүмкін екенін ескертеді.