Студенттер сарайының шатырын неліктен түнде құлату туралы шешім қабылданғанын ҚазҰУ да түсіндірді

Әл-Фараби атындағы Қазақ ұлттық университеті (ҚазҰУ) Алматыдағы Студенттер сарайы шатырының бір бөлігі нелге түнде бөлшектелгенін түсіндірді. Бұған дейін жұмыс орнынан түсірілген кадрлар әлеуметтік желілерде тараған болатын, деп хабарлайды Tengrinews.kz тілшісі.

Жұмыстар неге түнде жүргізілді?

ҚазҰУ-дың мәлімдеуінше, ескі шатыр жабынын бөлшектеу жұмыстары 23-інен 24 қыркүйекке қараған түні жүргізілген. Университет мәліметінше, жұмыстар бекітілген реконструкция жоспарына сәйкес атқарылды.

"Қауіпсіздікті қамтамасыз ету және оқу процесіне кедергі келтірмеу мақсатында барлық жұмыс түнгі уақытта орындалды", - деп хабарлады ҚазҰУ-дың баспасөз қызметі.

Фото: Тengrinews.kz

Университет бұған дейінгі ресми мәлімдемелер мен сұхбаттарда ғимараттың әбден тозғаны және ауқымды жұмыстар жүргізу қажеттілігі туралы алдын ала хабарланғанын атап өтті.

Еске сала кетейік, 24 қыркүйек күні таңертең Алматы тұрғындары Студенттер сарайының шатыры орнынан бетон блоктар мен темір конструкциялардың үйіндісін көріп, алаңдаушылық білдірген еді. Сырқы түріне қарағанда, мұнда опырылу болғандай әсер қалдырады. Қазіргі уақытта ғимаратқа реконструкция жасалып жатыр.

Бізді Google-дың негізгі дереккөздер тізіміне қосыңыз