Дерматолог неліктен маңдайда безеу пайда болатынын түсіндірді

АСТАНА, 9 ақпан – Sputnik. Дерматолог Кунал Малик жүйке күйзелісі кезінде неліктен көп жағдайда маңдайда безеу пайда болатынын түсіндірді, деп хабарлайды Sputnik Қазақстан.

Ол Cosmopolitan басылымына берген сұхбатында күйзелістің теріге қалай әсер ететінін және неге бөртпелер дәл осы аумақта шығатынын айтып берді.

Дәрігердің айтуынша, маңдайдағы безеудің пайда болуына терідегі ұсақ тесіктер май, өлі жасушалар мен бактериялардың қоспасымен бітелуі себеп болады. Бұл үдерісте генетика мен гормондық фон маңызды рөл атқарады, алайда күйзеліс мәселені күрт ушықтыруы мүмкін.

Адам уайымдаған кезде күйзеліс гормоны – кортизол деңгейі көтеріледі. Егер ол ұзақ уақыт бойы жоғары деңгейде сақталса, бірқатар реакция тізбегі іске қосылады.

Теріден "Р заты" деп аталатын нейропептид бөлінеді, ол май бездеріне тері майын көбірек бөлу туралы сигнал береді. Терінің шамадан тыс майлануы терідегі ұсақ тесіктердің бітелуіне әкеледі, соның салдарынан маңдайда бәрімізге таныс безеулер пайда болады.