Астанада автомобиль иесін суға батыра жаздады онда нақты не бұзылуы мүмкін еді?

Астанада ТЖМ қызметкерлері Есіл өзенінен қытайлық кроссоверді шығарып алды, деп хабарлайды Tengri Auto.

Автокөлік электронды жүйедегі ақау салдарынан өзен арнасына түсіп кеткен. Жүргізуші мен жолаушы көлік салонынан өз бетінше шыға алған. Ал көлікті шығару үшін құтқарушылардың көмегі қажет болды.

"Оқиға орнына ТЖМ жедел-құтқару жасағының құтқарушылары барды. Сүңгуірлер судағы жағдайды зерделеп, кранның көмегімен жеңіл автокөлікті судан алып шықты", - деп атап өтті ведомство.

Көлік иесі құтқарушыларға жедел әрі кәсіби көмегі үшін алғысын білдірді.

Электрмобильдерді жөндеу бойынша маман Никита Батющенконың айтуынша, теориялық тұрғыда электронды рөлдік рейкадағы ақау расында автокөлік траекториясының еріксіз өзгеруіне әкеп соғуы мүмкін.

Заманауи автокөліктерде рөл дөңгелегінің орны мен рөлдік рейканың бұрылу бұрышын анықтайтын датчиктер қолданылады. Бұл мәліметтер рөлдің электр күшейткіш жүйесіне беріледі. Жүргізуші рөлді бұрған кезде, рөлдік рейкадағы электр моторы тиісті команданы қабылдап, дөңгелекті бұруға көмектеседі.

"Егер датчик істен шығып, рөлдік рейка қандай да бір механикалық зақым алса, иә, теориялық тұрғыда бұл мүмкін", - деп түсіндірді Никита Батющенко.

Маманның айтуынша, оның тәжірибесінде рөлдік рейканың орналасу датчигінің дұрыс калибрленбеуі немесе зақымдануы салдарынан электр моторы рөлді өздігінен бұра бастаған жағдайлар болған. Соның бірінде автокөлікті оталдырғаннан кейін рөл бірден солға қарай тірелгенше бұрылып кеткен.

Бұл ретте Батющенко мұндай ақау өте сирек кездесетінін атап өтті. Автокөлік саласындағы 15 жылдық жұмыс тәжірибесінде ол мұндай екі жағдайды ғана кездестірген және екеуі де көлік қозғалмай тұрғанда болған.

"Осы электр рөлдік басқару жүйесінің істен шығуы датчиктерден қате мәліметтер алуына және мотор рөлді өз бетінше бұра бастауына әкеп соғуы мүмкін", - деді маман.

Оның сөзіне қарағанда, егер рөлдің электр күшейткіші істен шықса, жағдай басқаша болады: күшейткіш өшеді де, рөл ауырлайды. Дөңгелек өздігінен бұрылуы үшін бірнеше ақау, соның ішінде датчиктерден келетін қате сигналдар мен рөлдік рейканың ықтимал механикалық зақымдануы қатар келуі қажет.

Мұндай ақау оқиғаға себеп болған-болмағанын автокөлікті диагностикадан өткізгеннен кейін анықтауға болады. Маманның айтуынша, басқару блогында рөл дөңгелегі мен рөлдік рейка датчиктері мәліметтерінің сәйкес келмеуін көрсететін қате сақталуы мүмкін.

Бұл ретте сарапшы нақты автокөлікке диагностика жасамайынша, көліктің өзенге түсіп кетуіне электронды ақау себеп болды деп сеніммен айтуға болмайтынын атап өтті.

Электрмобильдерге күтім жасау кезінде қандай қателіктерді жібермеу керек?

Бізді Google-дың негізгі дереккөздер тізіміне қосыңыз