Петропавлда құрылысы басталған екі көпқабатты үй бұзылуы мүмкін

Солтүстік Қазақстан облысы мемлекеттік сәулет-құрылыс бақылау және лицензиялау басқармасының мәліметінше, біріншісі — Петропавлдағы Таңшолпан көшесі, 2/5 мекенжайында құрылысы жүріп жатқан көппәтерлі үй.

Жанындағы тұрғын үй кешені тұрғындары басқармаға шағымданып, құрылыстың заңсыз жүргізіліп жатқанын айтқан.

Соның негізінде тапсырыс беруші және құрылысты жүргізуші «Петромассив» ЖШС-не жоспардан тыс тексеру жүргізілді. 

Фото: СҚО мемлекеттік сәулет-құрылыс бақылау және лицензиялау басқармасы

— Бұл компанияның құрылыс-монтаж жұмыстарын жүргізуге лицензиясы жоқ. Бұдан бөлек нысан құрылысының бекітілген жобалау-сметалық құжаттамасы және техникалық және авторлық қадағалаулар жоқ, эскиздік жоба сақталмаған, құрылыс-монтаждау жұмыстарын жүргізуді бастағаны туралы хабарламаған. Басқарма нысанды бұзуға талап арыз берді. Бірақ СҚО мамандандырылған ауданаралық әкімшілік сотының ұсынысымен компанияның тексеру нәтижесіне және жедел ден қою шараларына шағымдануына орай іс шешілгенге дейін қайтарып алды. Десек те құрылыс-монтаж жұмыстарын 90 күнтізбелік күнге тоқтата тұру жедел ден қою шарасы қабылданды, — дейді басқарма басшысының міндетін атқарушы Азамат Исахметов.

Фото: СҚО мемлекеттік сәулет-құрылыс бақылау және лицензиялау басқармасы

Сегіз қабаты да көтерілген нысан енді бұзылуы мүмкін. 

«Петромассив» ЖШС былтыр қыркүйекте Петропавлдағы Набережная көшесі, 2Б мекенжайында көппәтерлі тұрғын үйді пайдалануға берген.

Бірақ бұл нысанда компания құрылысты өзі жүргізбей, тек тапсырыс берген. 

— Компания құрылыс-монтаждау жұмыстарын жүзеге асыруға лицензия алу үшін білікті инженерлік-техникалық қызметкерлердің, өндірістік базаның, материалдық-техникалық жарақтандырудың, сондай-ақ ІІ және І санаттағы лицензия алу үшін жұмыс тәжірибесі мен қолданысқа берілген нысандары болуы қажет, — дейді Азамат Исахметов.

Толық сүрілуі мүмкін екінші нысан — Н.Назарбаев көшесі, 329 «а» мекенжайындағы коммерциялық үй-жай мен паркингі бар көппәтерлі тұрғын үй кешені. 

Фото: СҚО мемлекеттік сәулет-құрылыс бақылау және лицензиялау басқармасы

Басқарманың мәліметінше, жеке кәсіпкер А.Беспалов сыртқы инженерлік желілерсіз және жобалау-сметалық құжаттамасыз құрылысты жүргізген. Тиісті органды құрылыс-монтаждау жұмыстарын жүргізуді бастағаны туралы ескертпеген.

Екі қабатын көтеріп үлгенген кәсіпкер де әкімшілік жауапкершілікке тартылды, құрылыс 90 күнге тоқтатылды. Нысанды бұзуға талап арыз жіберілді.