Қазақстанда ауыл шаруашылығы өнімдерін өңдеу көлемі 64% ға жетті

АСТАНА, 24 қыркүйек – Sputnik. 2023–2025 жылдары ет, сүт, майлы дақылдар, жүгері, күріш және қарақұмық сияқты негізгі өнімдерді қайта өңдеу үлесі 35%-дан 64%-ға дейін артты. 2026 жылдың соңына дейін бұл көрсеткішті 70%-ға жеткізу жоспарланып отыр, деп хабарлады үкімет.

Қайта өңдеу кәсіпорындарын қолдауға 2024–2026 жылдары шамамен 230 млрд теңге бағытталды. Қаржы жеңілдетілген несиелер, инвестициялық субсидиялар және басқа да қолдау тетіктері арқылы бөлінді.

Астықты терең өңдеу бағыттары

Астық секторында жыл сайын шамамен 510 мың тонна астық терең өңдеуге жіберіледі. Қазір крахмал, глютен және биоэтанол өндіретін үш кәсіпорын жұмыс істейді.

2025 жылы 152 мың тонна крахмал өнімі өндіріліп, бұл алдыңғы жылмен салыстырғанда 28,2%-ға көп болды. Биоэтанол өндірісі 21 мың тоннаға жетіп, бір жылда 2,2 есеге артты.

2029 жылға дейін астықты терең өңдеуге бағытталған жалпы құны шамамен 4 млрд доллар болатын алты ірі жобаны іске асыру жоспарланған. Олар жылына шамамен 5,8 млн тонна шикізатты өңдеуге мүмкіндік береді. Жобалар Түркістан, Жамбыл, Қостанай, Ақмола облыстары мен Астана қаласында жүзеге асырылады.

Ет, сүт және май өнімдері өндірісі

Елде шамамен 210 ет өңдеу және 180 сүт өңдеу кәсіпорны жұмыс істейді. Шұжық, ет консервілері, жартылай фабрикаттар және сүт өнімдерінің өндірісі кеңейіп келеді. Мәселен, 2025 жылы ет консервілерін өндіру көлемі 48,3%-ға өскен.

Май өнеркәсібінде 90-ға жуық кәсіпорын жұмыс істейді. Қазақстанда өндірілетін күнбағыстың 90%-дан астамы ел ішінде өңделеді.

Өңделген өнім экспорты өсіп келеді

2024 жылы агроөнеркәсіп кешені экспортының жалпы көлеміндегі өңделген өнімнің үлесі 52%-ға, яғни 2,66 млрд долларға жетті. 2023 жылы бұл көрсеткіш 43% болған.

2025 жылы ауыл шаруашылығы өнімдерінің жалпы экспорты 3,6 млрд долларға дейін өсті. 2030 жылға қарай аграрлық экспорттағы өңделген өнімнің үлесін 70%-ға жеткізу жоспарланып отыр.

Негізгі мақсат – ауыл шаруашылығы шикізатын ел ішінде барынша терең өңдеп, қосылған құны жоғары өнім өндірісін және экспортын ұлғайту.