ҚазҰУ студенттер қатарына қабылдауды жасанды интеллектінің қатысуымен өткізді

Qazaq24.com, Aikyn.KZ дереккөзінен алынған мәліметтерге сүйене отырып ақпарат бөліседі..

Әл-Фараби атындағы Қазақ ұлттық университетінде дәстүрлі Студенттер қатарына қабылдау салтанатты шарасы өтті, – деп хабарлайды Aikyn.kz сайты.

Биылғы кеш ерекше форматта ұйымдастырылып, 1-курс студенттерін оқуға қабылдау рәсімі жасанды интеллектінің қатысуымен жүзеге асты.

Салтанатты шараға ҚР ғылым және жоғары білім министрі Саясат Нұрбек, ҚазҰУ Директорлар кеңесінің төрағасы Қайрат Мәми, ҚазҰУ Басқарма Төрағасы-Ректоры Жансейіт Түймебаев, ҚР Сенатының депутаты Бибігүл Жексенбай, Алматыдағы ҚХР бас консулы Цзян Вэй және өзге де танымал тұлғалар қатысты.

Іс-шарада министр Саясат Нұрбек жастарды арнайы құттықтап, оқуда табыс тіледі.

«ҚазҰУ тек білім ордасы емес, тұлға қалыптастыратын, білікті маман даярлайтын, ғылым мен инновацияның орталығы. Мемлекет басшысы Қасым-Жомарт Тоқаев: «Жастар отаншыл, білімпаз, еңбекқор, үнемшіл, әділ әрі жанашыр болуы шарт», - деп атап өткен болатын. Президент айтқан қасиеттерді бойына сіңірген жас буынды тәрбиелеуде ҚазҰУ-дың рөлі зор. Университет тек теориялық білім беріп қана қоймай, студенттерді өмірлік ұстанымдары айқын, жауапкершілігі жоғары, бәсекеге қабілетті маман ретінде қалыптастыруда ауқымды жұмыстар атқаруда», - деді министр.

ҚазҰУ-дың Басқарма Төрағасы – Ректор Жансейіт Түймебаев «Ұлы ұстаз, ойшыл әл-Фарабидің «Ісім оңсын десеңіз, сол істің маманы болыңыз» деген қағидасын естен шығармаңыздар. Сіздердің тәрбиелі шәкірт болып, білікті маман, елін сүйетін тұлғалы азамат болып шығатындарыңызға сенемін», – деді ректор.

Жаңа оқу жылында ҚазҰУ-ға бакалавриат, магистратура және докторантура бағыты бойынша барлығы 11 530 студент қабылданды. Бакалавриатқа оқуға түскен жастардың ішінде 116 «Алтын белгі» иегері мен 27 халықаралық олимпиада жүлдегері бар. Биыл 2500-ден астам шетелдік студент Әл-Фараби атындағы ҚазҰУ-ды таңдаған.