Перизат Қайраттың туыстарының Дубайдағы пәтерлері: ҚМА не анықтады

Қаржылық мониторинг агенттігі (ҚМА) әлеуметтік желілерде сотталған Перизат Қайраттың туыстарының мүлкі туралы бұған дейін тараған ақпаратқа қатысты жауап берді. Атап айтқанда, олардың Дубайда бірнеше пәтері бар екені хабарланған болатын, деп хабарлайды Tengrinews.kz агенттіктің баспасөз қызметіне сілтеме жасап.

ҚМА мәліметінше, Перизат Қайраттың туыстары активтерді оның ұрлаған ақшасы есебінен сатып алуы мүмкін деген нұсқа бұған дейін тексеріліп, расталмаған.

"Тергеу барысында барлық қаржылық операцияға егжей-тегжейлі талдау жасалып, ұрланған қаражатты заңдастырудың толық көрінісі қалпына келтірілді. П. Қайрат иемденген қайырымдылық қаражатын көліктер, пәтерлер (олардың жөндеуі мен жиһазы), брендтік заттар мен әшекейлер сатып алуға, бизнес-класспен ұшуға және люкс қонақ үйлерде тұруға, мейрамханалар мен көңіл көтеру орындарына баруға жұмсаған. Бұл ретте А. отбасымен өзара есеп айырысу деректері анықталған жоқ", - деп хабарлады агенттік.

ҚМА жарияланымдарда көрсетілген жылжымайтын мүлік 2011-2019 жылдары, яғни Biz Birgemiz Qazaqstan 2030 қоры құрылғанға дейін және Перизат Қайраттың қылмыстық әрекеті басталғанға дейін әлдеқайда бұрын сатып алынғанын мәлімдеді.

"Жалпы, ерлі-зайыпты А. 20 жылдан аса уақыт бойы жылжымайтын мүлікті сатып алумен және қайта сатумен айналысады. Олар П. Қайрат пен оның анасынан бөлек тұрып, кәсіпкерлік қызметін дербес жүзеге асырған", - деп сендірді агенттік өкілдері.

ҚМА Қылмыстық-процестік кодекстің 161-бабының талаптарына сәйкес, мүлікті тұтқындауға және тәркілеуге оның қылмыстық жолмен келгені туралы дәлелдер болған жағдайда ғана жол берілетінін қосты.

"Күдіктілермен туыстық байланыстың болуы ғана қылмыстық қудалауға және активтерді алып қоюға заңды негіз бола алмайды", - деп атап өтті ведомство.

Перизат Қайрат — Қазақстандағы ең шулы қылмыстық істердің бірінің фигуранты болған Biz Birgemiz Qazaqstan 2030 қайырымдылық қорының бұрынғы басшысы. Тергеу оның қайырымдылық жинақтары атын жамылып, су тасқынынан зардап шеккендерге, Палестина тұрғындарына және мүгедектігі бар балаларға көмек ретінде жиналған қаражатты ұрлап, сондай-ақ осы ақшаның бір бөлігін заңдастырғанын анықтады. 2025 жылдың шілдесінде сот оны аса ірі көлемде алаяқтық жасағаны және қылмыстық жолмен алынған кірістерді жылыстатқаны үшін кінәлі деп таныды. Перизат Қайрат мүлкі тәркіленіп, 10 жыл бойы қайырымдылықпен айналысу құқығынан айырыла отырып, 10 жылға бас бостандығынан айырылды.

Бізді Google-дың негізгі дереккөздер тізіміне қосыңыз