Корея визасы үшін 12 миллион ба? Шымкенттегі іс күтпеген бағытқа бұрылды

Шымкентте 12 миллион теңгеге қатысты алаяқтық іс бойынша әйел ақталды. Айыптау нұсқасы бойынша, ол жәбірленуші мен оның әпкелеріне Оңтүстік Кореяға бизнес-виза рәсімдеуге көмектесуге уәде беріп, сол үшін ақша алған. Алайда сот ұсынылған дәлелдер бұл нұсқаны растамайды деген қорытындыға келді, деп хабарлайды Tengri Travel.

Қазақстандыққа қандай айып тағылды?

Шымкент қаласының қылмыстық істер жөніндегі ауданаралық сотының ақпаратынша, айыптау нұсқасы бойынша, 2025 жылдың тамызында материалдарда М. деп көрсетілген қала тұрғыны бір әйел мен оның әпкелеріне Оңтүстік Кореяға бизнес-виза алуға көмектесуге уәде берген. Бұл қызметі үшін ол 12 миллион теңге алды деп айыпталды.

Прокурор сотталушыны бас бостандығынан айыруды сұрады. Жәбірленуші де қатаң жаза қолдануды талап етті. М.-ның өзі кінәсін мойындамай, соттан өзін ақтауды сұрады.

Айыптау дәлелдерінің қатарында жәбірленушінің айғақтары, қолхат, бейнежазба және психологиялық-филологиялық сараптама қорытындысы болды. Алайда, сот тергеу барысында бұл материалдар алаяқтық туралы нұсқаны растамағанын айтты.

"Сарапшыларға зерттеу үшін тек қиып алынған 15 секундтық жазба ұсынылған, бірақ бейнежазбада 12 миллион теңгенің берілген немесе алынған сәті, қолхат жазу фактісі, сондай-ақ визалар бойынша алдын ала уағдаластықтар тіркелмеген", - деп атап өтті соттағылар.

Сонымен қатар тараптар арасындағы 2025 жылдың шілде мен тамыз айларындағы хат алмасулардан Оңтүстік Корея мен визалар туралы ешқандай мәлімет табылмаған.

"Тараптардың 2025 жылдың шілде-тамыз аралығындағы телефон хаттарында Корея мен визалар туралы ақпарат мүлдем жоқ. Сонымен қатар жәбірленуші тарапынан алтын бұйымдар үшін ақшаны қайтаруды талап еткен көптеген қоңырау мен қоқан-лоқылар тіркелген", - деп толықтырды сот.

Сондай-ақ жәбірленуші де, оның әпкелері де сотталушыға виза рәсімдеу үшін құжаттар бермегені белгілі болды. Жәбірленушінің әпкелері М.-мен ешқашан кездеспеген және бұл мәселені талқыламаған.

Сот әйелдер арасындағы жанжал виза рәсімдеуге емес, бұрын сатып алынған алтын бұйымдар үшін берешекке байланысты болған деген қорытындыға келді. Бұл ретте сот айыпталушының 12 миллион теңге алғаны туралы дәлелдер таппаған.

Нәтижесінде сот М.-ның іс-әрекетінде қылмыстық құқық бұзушылық құрамы жоқ деп тауып, оны ақтады.

Үкім заңды күшіне енді.

Тағы оқыңыз: Несиеге тур сатып алған қазақстандықтар ұшар алдында алаяққа алданғанын білді

Бізді Google-дың негізгі дереккөздер тізіміне қосыңыз