Атырау тұрғындары АМӨЗ маңындағы ауа сапасын онлайн бақылай алады

Атырау мұнай өңдеу зауытының атмосфералық ауа сапасын мониторингтеуші автоматты станцияларының мәліметтері кәсіпорынның ресми сайтында қолжетімді болды.

Сайттың басты бетінде АМӨЗ-дің санитарлық-қорғау аймағының шекарасында орналасқан төрт экологиялық бекеттен — «Перетаска», «Химпоселок», «Мирный» және «Пропаркадан» түсетін көрсеткіштер нақты уақыт режимінде көрсетіледі.

Тұрғындар күкіртсутек, азот оксиді мен диоксиді, күкірт диоксиді, көміртек оксиді концентрациясын, сондай-ақ желдің бағытын бақылай алады.

Кәсіпорыннан хабарлағандай, ақпарат тікелей «Қазгидромет» РМК-дан түседі және сағат сайын жаңарып отырады.

Сайттан бөлек, экобекеттердің көрсеткіштері зауыт аумағының кіреберісіне орнатылған LED-экранға шығарылады.

Экологиялық мониторинг жүйесі АМӨЗ-де 2010 жылдан бері жұмыс істейді және атмосфералық ауа сапасын үздіксіз бақылауға арналған.

Кәсіпорын өкілдері экологиялық қызмет және оның нәтижелері туралы ақпаратты ашық жариялауды әрі қарай да жалғастыратынын мәлімдеді.

8 қазан, 16:25