Қазақстандықтар пойыз қозғалысын онлайн бақылай алады

Қазақстандықтар енді пойыздардың қозғалысын онлайн бақылауға мүмкіндік алды.

«Қазақстан темір жолы» АҚ-ның хабарлауынша, tablo-railways.kz сайтында «Пойыз қозғалысының онлайн-таблосы» сервисі іске қосылған. Ол жолаушыларға пойыздың нақты уақыттағы орналасқан жерін картадан көруге, келу және кету уақытын тексеруге, аялдайтын станциялардың тізімін, аялдау ұзақтығын және соңғы станцияға болжамды келу уақытын білуге мүмкіндік береді.

Компания бұл қызметтің әсіресе жолаушылар ағыны көп кезеңде пайдалы екенін атап өтті. Жолаушылар вокзалға шығу уақытын алдын ала жоспарлап, артық күтуден құтылады.

Сервисті пайдалану үшін tablo-railways.kz сайтына кіріп, картадан қажетті пойызды таңдау жеткілікті. Сонымен қатар bilet.railways.kz сайтындағы «Онлайн-табло» баннері арқылы да қолжетімді.

Қызмет GPS-трекерлер негізінде жұмыс істейді: пойыздардағы құрылғылар деректерді «Жолаушылар тасымалы» АҚ-ның Ситуациялық орталығына жіберіп, тәулік бойы бақылау жүргізіледі.

Бүгін, 13:24