Алматы әкімдігі лық толы автобус аялдамасы түсірілген видеоға түсініктеме берді

Алматының Шұғыла шағынауданының тұрғындары 14 қазан күні таңертең қоғамдық көлік жұмысындағы іркілістерге шағымданды. Олардың айтуынша, автобустарды ұзақ күтуге тура келген, ал кейбір жүргізушілер аялдамаларға тоқтамай, жолаушыларды алмай өткен. Соның салдарынан қала тұрғындары жаяу жүруге немесе таксимен жетуге мәжбүр болды. Әкімдікте кешігулердің себебін түсіндірді, деп хабарлайды Tengrinews.kz тілшісі.

Жаяу жүруге мәжбүр болды

Алматы тұрғындары қарбалас уақытта қоғамдық көліктің келу аралығының ұзақтығына және адамға лық толы автобустарға мінудің қиындығына шағымдануды жалғастырып жатыр.

Шұғыла шағынауданының тұрғындары 14 қазанда бұдан да қиын жағдайға тап болды. Олардың сөзінше, автобустар мүлдем келмеген, ал көбі аялдамадан тоқтамай өтіп кеткен. Нәтижесінде қала тұрғындарының бір бөлігі жаяу жүруді немесе баратын жеріне таксимен жетуді ұйғарған.

Қала тұрғындарының шағымдарына қатысты жуап бере отырып, Алматы әкімдігі 14 қазанда қоғамдық көліктердің желіге жоспарлы шығуы 98 пайызды құрағанын мәлімдеді.

"Сонымен қатар Алатау даңғылындағы жол желісінің шамадан тыс жүктелуіне байланысты қоғамдық көліктің қозғалыс интервалдарының ұзаруы және бекітілген кестеден ауытқулар байқалды. Орталық басқарманың диспетчерлік қызметі жағдайды тұрақтандыру бойынша жедел шаралар қабылдады", - деді әкімдіктегілер.

Сондай-ақ қазіргі уақытта қоғамдық көліктер бекітілген кестеге сәйкес штаттық режимде қатынап жатқаны атап өтілді.

Еске сала кетейік, алматылықтар қоғамдық көліктің лық толуына қыркүйек айында, оқу жылы басталғаннан-ақ шағымдана бастаған болатын. Қосымша 500 автобус шығарылғанына қарамастан, тұрғындар әсіресе таңғы қарбалас уақытта автобус салондары мен метро станцияларындағы кептелістер туралы хабарлаған еді.

Әкімдік жүктеменің артуын жолаушылар ағынының, оның ішінде студенттер есебінен өсуімен түсіндірді. Ең көп жүктеме түсетін бағыттар ретінде "Бауыржан Момышұлы" және "Сайран" метро станцияларының маңындағы аудандар аталды. Ол кезде билік өкілдері жүктеме жоғары маршруттарды күшейтуді және қозғалыс интервалдарын реттеуді жалғастыратынын мәлімдеген болатын.

Бізді Google-дың негізгі дереккөздер тізіміне қосыңыз