500 автобус көмектеспеді ме? Алматылықтар лық толы көлікке шағымданды

Оқу жылы басталғанда желіге қосымша 500 автобус шыққанына қарамастан, алматылықтар қоғамдық көліктің лық толы болуына шағымданып жатыр. Бұл мәселе әсіресе қарбалас уақытта қатты сезіледі. Tengrinews.kz әкімдіктен неге кейбір бағыттарда әлі де жүктеменің жоғары болып отырғанын сұрап білді.

"Автобустар лық толы": алматылықтар неге шағымданады?

Желіде Алматы тұрғындары қоғамдық көліктің толы болуына шағымданып жатыр. Қала тұрғындарының бірі Шұғыла шағынауданындағы таңертеңгі жағдайды айтып берді.

Оның сөзінше, таңғы сағат 7:10 шамасында Бауыржан Момышұлы метро бекеті бағытындағы автобустар лық толып келеді. Олардың арасындағы қысқа интервал да жағдайды түзеп отырған жоқ.

"Бекет бағытындағы барлық автобус лық толы. 3–5 минуттық интервал жағдайды реттеуге жетпейді. Одан кейін Б. Момышұлы бекеті, 3 минуттық интервал, ол да мәселесі шешпейді. Алматы әкімдігі, иә, жаңа қасбеттер мен жаяу жүргінші аймақтары өте керемет, бірақ инфрақұрылыммен де айналысыңыздаршы", – деп жазды Алматы тұрғыны.

Threads қолданушысы @zhanna_rakhmet-тің фотосы

Сонымен қатар ол лық толы көлікпен қатынауға мәжбүр мектеп оқушыларына назар аударып, оларға бөлек тасымал ұйымдастыруды ұсынды.

Threads қолданушысы @zhanna_rakhmet-тің видеосынан кадрлар

"Автобуста тұрудың өзі қиын"

Басқа қолданушылар да осыған ұқсас жағдайларды айтты. Олардың сөзінше, қарбалас уақытта кейбір автобустарға кіру мүмкін емес.

"Автобустар санын көбейтіңіздер. Бұрын еркін отыру мүмкін болмаса, қазір тіпті тұрудың өзі қиын", – деп жазды қолданушылардың бірі.

Threads желісіндегі жазбалардың скриншоты

Жазбалар астындағы пікірлерде қолданушылар жолаушылардың көптігінен телефон арқылы жолақысын төлеудің өзі қиындап кеткенін атап өтті.

Threads қолданушысы @zhanna_rakhmet-тің видеосынан кадрлар

Автобустар неге әлі де лық толы?

Әкімдік жоғары жүктемені оқу жылының басталуымен және жолаушылар ағынының, оның ішінде студенттер есебінен артуымен түсіндірді.

"Қазіргі уақытта жолаушылар ағынының айтарлықтай өсуі байқалады, бұл соның ішінде студенттер санының артуына байланысты, нәтижесінде кейбір бағыттарда қоғамдық көлікке жүктеме артты", – деп хабарлады әкімдік.

Қосымша 500 автобус көмектеспей ме?

Алматы билігі қоғамдық көлікті көбейту жоспары туралы 31 тамызда хабарлаған болатын. Сол кезде әкімдік оқу жылының алғашқы екі аптасында 3 200 автобусқа резервтен тағы 500-ге жуық көлік қосылатынын айтқан.

Әкімдік Tengrinews.kz-ке қосымша 500 автобус желіге шыққанын растады.

"500 автобус қосылды, олардың барлығы қазір желіде. Бүгінде 3 700 автобус бар: оның 3 200-і тұрақты жұмыс істейді, тағы 500-і қыркүйектің алғашқы екі аптасында қосымша қызмет көрсетеді", – деп нақтылады әкімдік өкілдері.

Дегенмен, кейбір бағыттар әлі де лық толы. Әкімдік мұндай учаскелер қатарына метроның соңғы бекеттері маңындағы аудандарды, соның ішінде "Бауыржан Момышұлы" және "Сайран" бекеттерін жатқызды. Әсіресе таңертеңгі және кешкі уақытта жүктеме өте жоғары.

Әкімдік тасымалдаушылармен бірге жүктеме көп түсетін маршруттарда автобустар санын арттыруды және қозғалыс интервалын түзетуді жалғастыратынын жеткізді.

Алматы қыркүйектегі жүктемеге қалай дайындалды?

Бұған дейін әкімдік оқу жылы басталғанда Алматы жолдары мен қоғамдық көлікке түсетін жүктеме айтарлықтай артатынын ескерткен болатын. Қосымша 500 автобустан бөлек, билік метро пойыздары санын 11-ден 13-ке дейін көбейтіп, таңертеңгі қарбалас уақыттағы интервалды үш минутқа дейін қысқартты.

Сонымен қатар, 1-5 қыркүйек аралығында әкімдік қызметкерлерінің бір бөлігі қашықтан жұмыс істеуге ауыстырылды, ал ірі компаниялар мен банктерге қызметкерлерді уақытша қашықтан оқыту форматына көшіру немесе жұмыс күнінің икемді басталу уақытын енгізу ұсынылды. Алматылықтарға мүмкіндігінше жеке көліктен бас тартып, қоғамдық көлікті пайдалануға кеңес берілді.

Тағы оқыңыз: Қашықтан жұмыс істеу және қосымша автобустар: 1 қыркүйекте Алматыны не күтіп тұр?

Алматылықтар 1 қыркүйектегі лық толы метро кадрларын көрсетті

Google News арқылы жаңалықтарымызды қадағалаңыз

Жазылу