​ІІМ мектеп бітіру кешіне қандай жағдайда полиция баратынын түсіндірді

Ішкі істер министрінің орынбасары Санжар Әділов полиция қызметкерлері бітіру кештерін мерекелеу кезінде арнайы рейдтер жүргізуді және ойын-сауық орындарын тексеруді жоспарлап отыр ма деген сұраққа жауап берді, деп хабарлайды Zakon.kz.

Сенат кулуарында журналистер ІІМ басшысының орынбасырынан Оқу-ағарту министрлігінің бұған дейін бітіру іс-шаралары мен аттестат тапсыру рәсімдеріне қатысты белгілеген ұсыныстары мен тыйымдарының сақталуын полицейлердің нақты қалай қадағалайтынын сұраған болатын.

Санжар Әділов полицияның мейрамханалар мен дәмханаларда арнайы рейдтер мен жаппай тексерулер ұйымдастыруды жоспарлап отырмағанына сендірді.

«Тиісті шешімді Оқу-ағарту министрлігі қабылдады. Қайталап айтамын, ішкі істер органдарының қызметкерлері қандай да бір орындарды арнайы аралап, тексермейді. Тәртіп сақшылары тек жасалған құқық бұзушылық туралы белгі (сигнал) түскен жағдайда ғана әрекет етеді», – деп түсіндірді министрдің орынбасары.

Бұл ретте ведомство мынаны баса айтты: егер полицияға ресми шақырту түссе немесе әкімшілік құқық бұзушылықтың айқын белгілері (мысалы, тыныштықты бұзу, кәмелетке толмағандардың алкоголь өнімдерін тұтынуы немесе бұзақылық) анықталса, тәртіп сақшылары қатаң шаралар қолданып, кінәлілерді жауапкершілікке тартады.

Бұған дейін Қазақстанның Оқу-ағарту министрлігі ата-аналар мен мектеп директорларына ресми үндеу таратып, бітіру кештерінде сән-салтанатты дастарқан жаюдан, қымбат сыйлықтардан және лимузиндерді жалға алудан бас тартуды, тек білім беру мекемелерінің қабырғасында аттестаттарды салтанатты түрде тапсырумен шектелуді табанды түрде ұсынған болатын.

Бүгін, 17:01